Texts
Return to list | edit | delete | Create a new | history | Statistics | ? Help
Papin kasakka
Papin kasakka
Karelian Proper
Uhta
Oli
ennen pappi ta papat’ja .Hyö ollah vanhat ta hyvin pohatat .Šanou akka , jotta "mäne šie , pappi , eččimäh kasakkua , kun myö emmä voi ni mitä ruatua enämpi , kun olemma vanhat ".Šanou :
– Kun mänet , niin Iivanua elä ota , Iivanat ollah hyvin kavalat .
No tai pappi läksi ta mänöy yhteh kyläh .Tuli poika vaštah , kyšyy :
– Kunne , pappi , läksit ?
– Kasakkua eččimäh , – šanou . – Ka mi šiula on nimi ?
– Iivana .
– Akka ei käšken ottua Iivanua .
Poika juokši eteh ta poikki polvelta vaštah .Kyšyy :
– Kunne , pappi , läksit ?
– No kasakkua eččimäh .
– Ota milma .
– Ka mipä šiula on nimi ?
– Ka Iivana .
– Akka ei käšken Iivanua ottua .
Vielä kolmannen kerran poika juokšou poikki polvelta vaštah .Kyšyy :
– Minne , pappi , läksit ?
– Kasakkua eččimäh .
– Ota milma .
– Ka mipä šiula nimi ?
– Iivana .
– Ka en mie voi ottua , akka ei käšken Iivanua ottua .
Iivana šanou :
– Ka miän linnalla ei ni ole kuin Iivanua kaikki , hoš kuin pitälti eči .
No šanou :
– Lähe šilloin .
Mäntih pappilah , kyšyy :
– Mipä tällä on nimi ?
Šanou :
– Ka Iivana on nimi .
– Ka miksipä šie otit Iivanan , miehän šanoin , jotta elä ota Iivanua .
Še poika šanou , jotta "miän linnalla ei ole ni ketä kun Iivanua ".
Šiitä hyö otetah še poika .No otetah ta kyšytäh :
– Šuatatko šie halkuo leikata ?
– Ka šillähän mie olen piätäni elättän .
Huomenekšella nouštih makuamašta , šyötettih Iivanua ta juotettih , pantih kesselih eväštä hänellä .Kyšytäh :
– Voisitko šie leikata kolme šyltä ?
No hiän šen voipi !Iivana šielä mäni , päivän šyöy ta makuau , šyöy ta makuau mečäššä .Otti katkasi kolme varpua , joka šylen piäh pani varvan – kolme šyltä i tuli varpua .Tuli kotih muka vaivukšissa , ei taho pirttih piäššä .Ne vaštah tullah .
– Äijänkö šait ? – kyšytäh .
– Ka kolme šyltä .
Šiitä tuaš häntä šyötetäh ta juotetah , pantih kiukualla muate .Tuaš pantih eväštä kesselih ta šanotah :
– Voisitko šie leikata kuuši šyltä halkuo ?
Kyllä hiän šen voipi , kuuši šyltä .Heilä hyvä mieleštä – nyt hyö šuatih hyvä kasakka .Pappi šanou vielä akallah :
– Kačo , kun šie Iivanua moitit , a kun šaimma hyvän kasakan .
Iivana tuaš läksi meččäh .Mäni meččäh ta leikkasi kuuši varpua , ta tuaš pani šiitä šamah pinoh , aina šylen piäh varvan .Та koko päivän šielä mečäššä šyöy ta makuau .No illalla tulou kotih , tuaš juoššah vaštah :
– No äijänkö šie šait ?
Iivana šanou :
– Antuat työ mie šyön ta levähtelen , šiitä šanon .Niin olen vaipun , jotta en paissa voi .
Iivana šöi ta tupakoičči šiinä vähäsen , henkähteli .Pappi ta papat’ja ieššä šeisotah ta vuotetah , äijänkö hiän šai .Kyšytäh :
– No äijänkö šie šait ?
Iivana šanou :
– No ka kuuši šyltä .
Matuška piättelöy , jotta kyllä on hyvä kasakka .No tuaš kolmantena huomenekšena šanotah , jotta tuaš pitäy männä halkuo leikkuamah .Tuaš pantih hänellä eväštä kesselih kolmantena piänä .Pappi aina varottau , jotta "panehan hyvät evähät Iivanalla , jotta vois ruatua ".Pappi šanou :
– Yritähän , voitko šuaha yhekšän šyltä .
No kyllä hän voi , kun on näin hyvät evähät !Iivana tuaš mäni meččäh .Päivän šöi ta makasi , yhekšän varpua leikkasi , kaikki pani yhteh pinoh aina yhen šylen piäh .No illalla tuli kotih .Tuaš juoššah vaštah :
– No šaitko šie äijän ?
– Ka antuat työ mie šyön ta levähtelen , en mie voi paissa , kun niin vaivuttau .
Šöi ta joi , hyö ieššä šeisotah ta vuotetah .Vielä tupakoičči vähäsen aikua .No hyö nyt kyšyy :
– Kuin äijä šie šait vieläki ?
Hiän šanou :
– Ka yhekšän šyltä .
Piätelläh , jotta "kyllä meilä on hyvä kasakka ".No pappi šanou :
– Lähemmä huomena kaččomah .
Yöllä kun še kasakka makuau kiukualla , šotkou leipiä vartahašta paitah välih evähiksi .Tai lähettih huomenekšella meččäh (pappi ei ottan eväštä , luulou , jotta rutto käyväh ).Hyö kävelläh , kävelläh päivä – halkopinoja ečitäh (a še poika tietäy , jotta šielä on vanha talli , hevoistalli ).A še jo ihan pimeni .Poika piättäy , jotta "nyt meijän pitäy yötä olla täššä tallissa , emmä ni kunne piäše , ekšyn olemma ".A pappi on niin vaipun ta näläštyn , jotta juuri piäšöy šinne tallin nurkkah muate .A Iivana mäni toiseh nurkkah ta alko šyyvä suuhkarie paitah välistä .A pappi kyšyy :
– Iivana , mitä šie šyöt ?
No Iivana vaštasi :
– Ka tiälä on vanhojen heposien kakarehie , kuivanehie , niitä puren .
Pappi kyšyy :
– Onko ne hyvät ?
Iivana šanou :
– Ka nälkähisellä hyvät on , mie olen ennenki näitä šyönyn .
Pappi šanou :
– Työnnähän miulaki , ole niin hyvä .
Iivana šieltä keräi kamahlollisen ta vei .Pappi alko purekšennella niitä ta piätti :
– Kyllä nämä i ollah hyvät .
Muattih yö ta lähettih tuaš taipalehella , muka kotih , jotta hyö ollah ekšytty .Vain Iivana tietäy , minne männä .Iivana tietäy , jotta šiinä tallin läššä on talo .Ihan päivän käytteli , käytteli šitä pappie mečäššä , ta tultih šiih taloh yökši .Iivana tietäy , jotta šiinä talošša šyötetäh , vain ei pie šanuo , jotta "passipo , ei miula pie ".Iivana šanou papilla :
– Kun käšetäh šyömäh , niin pitäy šanuo , jotta "passipo , ei miula pie ".Šiitä kun toisen kerran käšetäh , šiitä vašta rupiemma .
No hyö mäntih taloh , pantih talošša ruokua kaikilla .
Šanotah :
– Vierahat , nouškuate šyömäh .
Pappi šanou :
– Passipo , eihän meilä pie .
A Iivana rupei šyömäh , pappi jäi laučalla .Pappi ei ni ilennyn ruveta šyömäh , kun toisen kerran ei käšetty .Yön oli pappi niin näläššä .Lähettih kotihis huomenekšella aštumah .A koti heilä ei ollun loittona (a Iivana päivän käytteli häntä mečäššä ).Illalla mäntih kotihis .Pappi näläšty niin ta vaipu , kun šöi – ei voinun ni mitä paissa – niin muate .A Iivana tuaš kuuntelou , kun huomenekšella pappi akkah kera paissah .Pappi šanou :
– Šuattakka pois tuo Iivana , proitimma kokonah , niin pepeltäy , kun kakši päivyä mečäššä käytteli .Jo heposen šittakakarua šöin , en tiijä , mitä hän iče šöi .
Maatuška šanou :
– Ka jošpa še ei lähe , kun kolmekši vuuvekši palkkasima .
Pappi šanou :
– No kun šen kolmen vuuven palkan makšamma , niin totta hiän šiitä lähtöy .
A Iivana še kuuntelou .No huomenekšella nouštih makuamašta .
– No nyt meilä , – šanotah , – Iivana , ei ole enämpi työtä , mäne poikes kotihis .
– A kuin mie lähen pois , kun olen kolmekši vuuvekši palkkautun , nakrauhan milma rahvaš .
– No vuuven palkan makšamma , šen šata rupl’ua .
– Ka mie en , – šanou , – lähe vuuven palkalla , mie olen kolme vuotta .
– Ka meilä kun ei ole työtä – myö makšamma kahešta vuuvešta palkan .
Iivana šanou :
– Još kolmelta vuuvelta makšatta palkan , niin mie lähen , a muit’en en lähe .
Pappi šanou akalla :
– Mäne eči rahat , kolme šatua rupl’ua , anna mänöy mušikka kotihis .
Iivana läksi kotihis , vielä annettih hyvät evähät , jotta ei näläššä olis .Pappi piätti , jotta , "kyllä meilä tuli hyvä , kun šuattoma poikes , oli šemmoni valehtelija ".
No Iivana mäni kotihis , kolme šatua rupl’ua toi rahua muamollah ta tuatollah , ta netälin viipy koko reissullah .Šiitä oššettih heponi ta tavarua , ta niin piäštih Iivanan joukko elämäh .
Šen pivuš starina .
Papin kasakka
Karelian Proper
Uhta
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
Попов работник
Russian
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–