Texts
Return to list | edit | delete | Create a new | history | Statistics | ? Help
Itkuvirzi muamolla
Itkuvirzi muamolla
Karelian Proper
Myandyselga
Vuota
rubien kurja lindurukka ,
hoi kukkahilla ilmoilla azettaja ,
kukas kandajazeni , rubien siuda kuonnuttelomah .
Kuonnu kurjan lindurukan kuonnutuksella .
Hoi armahilla ilmoilla azettaja , armas kandajazeni ,
aigauvu angehen lindurukan aigautuksilla .
Kylmänyö lindurukka kylmien kyynelvedyzien [kera ]
siuda kuonnutan suurissa igävissä .
Hoi armas kandajazeni , jättelit miuda
aigazista aijoista sua armottomien nimilöijen akkiloiččijaksi .
Ved rubietah milma kylmyä lindurukkua
alimbazet aijanrizud abeimah .
Hoi , sido kandajaizeni , jättelit miun
siivottomien siročkoiloijen nimilöin kandelijaksi .
I nuorista maldiloijen malttamattomista aijoista
jättelit siivottomien siročkojen
nimilöijen kandelijakse miun lindurukan .
Vet on vaivazella lindurukalla
varret kessen varttumattomat ,
olen ylen nuorillai malttamattomilla mielyzillä .
Kui rubien , angei lindurukka ,
hoi armahilla ilmoilla azettaja , armas kandajaizeni ,
omie varžiloi kazvattamah kallehil ilmoilla piällä ?
Hoi kallis kandajazeni ,
ved ruvetah pal'l'uo lindurukkua
pahemmat ni pajakebrud painamah .
Ei angehella lindurukalla
jiänyn ni myttyzie armoloi .
Hoi sugie sula kandajazeni ,
ei sugiella lindurukalla jiänyt
myttynäzie sulie sugeilla ilmoilla piällä .
Vet surenduo lindurukkua
rubetah pienet pihakebrud pan'aimah .
Hoi , armas kandajazeni , kun sie aigazista
aijoista suati jättelit miun armottomaksi .
Vet surennolla lindurukalla on suuret igävät ,
ku jättelid aigazista aijoista sua
armahilla ilmoilla armottomaksi .
Ved angehta lindurukkua ruvetah ahavatuuluot abeimah .
Hoi , armas kandajazeni , kun jättelid
hyvin nuorilla ajoilla armottomaksi .
Ken rubieu vaivazella lindurukalla
varren piälizie varžisobie azettamah ?
Hoi valgiella ilmoilla piällä [azettaja ], valgie kandajazeni ,
kuin myö valgieh spuassuzih siut azetamma ?
Hoi valgie kandajazeni ,
kuni vaivani lindurukka varžiloilla vartun ,
ken rubieu varren piälizie varžisobazie azettamah ?
Hoi valgiella ilmoilla [piällä ] azettaja , valgie kandajazeni ,
vaivazen lindurukan valgie valda hyväzeni ,
valgiel ilmoilla [olija ] on
moožet ei rubie azettamah varrenpiälizie varžisobazie .
Hoi , armas kandajazeni , hoi sugie sula kandajazeni ,
ylen suurih ilmoijen suurehuzih igävih jäin
nuorilla kessen varžiloista varttumattomilla
aijoilla , vajailla varžiloilla .
Hoi olovilla ilmoilla piällä azettaja ,
olova odžalannoi kandajazeni ,
kuin olet olovissa spuassuzissa ,
ni andele hot' onehella lindurukalla
paremmat ozat olevilla ilmoilla piällä ollessa .
Hoi kallehilla ilmoilla piällä kannettelija ,
kallis kandajazeni , andele kargijala lindurukalla
kallehista spuassuzista päin paremmat čuastized ,
kui jättelit aigazista aijoista sua
nuorilla maltattomilla aigazilla .
Vet olen angei lindurukka armotoin .
Ei ole ni armahien alguigien azettajua ;
armasta hyväistä armahilla ilmoilla piällä .
Ynnä siivotoin lindurukka olen
armahilla ilmoilla piällä sirotta .
Siivottojen siročkojen nimilöijen kandelija olen .
Itkuvirzi muamolla
Karelian Proper
Myandyselga