Texts
Return to list | edit | delete | Create a new | history | Statistics | ? Help
Oi uroi kalliš armuoaženi, nygy kačo on (konzu viemäh l'ähtedäh, siid itkedäh)
Oi uroi kalliš armuoaženi, nygy kačo on (konzu viemäh l'ähtedäh, siid itkedäh)
Ludian
Southern Ludian (Svjatozero)
3. (— A
kaimaandu virty eigo ole ?
— Konzu viemäh l'ähtedäh , siid itkedäh :)
Oi uroi kalliš armuoaženi , nygy kačo on
ylen l'ähižedi liittuoažedi tuldah d'o .
Kai jo roditaheze dostali jo huolovadi huondeksudet .
A nygy jo kačo l'ähetäh dostali čuasuižedi ,
n oi uroi kalliš armuoaženi , ottele kai
kaunehizi n ikkumpielyižizi jo igäžedi prošken'n'äižedi ;
nygy l'ähtedi kai tundemattomile dorogaižile .
Ottele kai kaunehis luaduižis dai l'äylimiz
l'ämmis päčiižisi igäižet prošken'n'aižedi .
Nygy l'ähtedi kai tundemattomil'e dorogaižil'e ,
kai viehkattomide askeluižidi panettel'emah .
No in uroi kalliz armuoaženi dai sula-hyväiženi jo ,
hod'd'o tule sinä minulloo sigin unuižih uinottuw
hotin ozutelde da sanele ,
mittumadi rodih senilmaizis malituižizi eloksudet ka .
Nygy andele kai , sulgaizil'e , d'o dostali
minuuttaižedi n igäižedi prošken'n'aižedi ,
andelkatte n armahadi kandamudenid
alahaižedi pieäpoklonaižet .
Dai sula-hyväiženi , andele kurdaižel'e n akale ,
minule dostali-kiearaižedi n igäižedi prošken'n'aižed .
Nygy l'ähti kačo lähtedi toičitulemattomil'e dorogaižil'e jo ,
ei ni häneni d'älgyižid rodi d ei
kuulta ni nähtä n enämbädi .
Kai kuvamudenid , muštagatte n uroi kallehen
armuoaženi ni d'älgydedi jo miittumil d'älgyižili käveli .
Kai kippijädi kalaižedi tuotteli puaksut kiearaižet .
A nygy kačo n ei rodide hänen n enämbäl
kuulta d'älgyižid , ni nähtä .
N älgätte ni , oi kuvamudenidi ,
Nygy kaunehedi uuliččaižed , andelkaatte
n uroi kallehel'e n armuožele igäižedi prošken'n'aižet .
Dai sula-hyväiženi , kai sulat susedad dai
heledät heimokundaižet ,
andelkat n igäižedi prošken'n'aižed .
Nygy l'ähti toiččitulemattomil'e dorogaižili
kai viehkattomid askeluižit panettelemah .
Kai läylemädi lämmädi kylyižedi oli
puaksuiden kiearaižiden kävyny ,
dai vesselädi vezi-valgamuožed andelkatte
n uroi kallehel'e armuoažele dai sula-hyväiženil'e ,
nygy lähti kačo toičitulemattomil'e dorogaižil'e .
(Sit pihas , kačo , l'ähti , prošen'n'as , otetah prošken'n'u da mugai lugedaw viedes sinne :)
Andagat šuapkoi-pieähydet ,
paikoi-pieähydet igäižet prošken'n'aižet .
Oli puoaksuiden kieraižiden kävyny .
Nygy l'ähti kačo tundemattomil'e dorogaižile
viehkattomid askeluižid panemah .
(Sid mugai .)
Oi uroi kalliš armuoaženi, nygy kačo on (konzu viemäh l'ähtedäh, siid itkedäh)
Ludian
Southern Ludian (Svjatozero)