Тексты
Вернуться к списку | редактировать | удалить | Создать новый | История изменений | Статистика | ? Помощь
Golovat
Golovat
карельский: людиковское наречие
Южнолюдиковский (святозерский)
– Otamme
nügü Golovan taluoin , kedä sigä oli ?
Golovaz eli ...
Ei loitton , časounaz oldu hüö , elettih lähin grežal , perttikulu vahne .
Kačo , heit Golovakse kirguttih : lähtöü sobran’aih libo midä , siid viiberittih golovakse .
Oli St’opan Ivanič , Sorokinakse kirguttih ka Golovakse , sinä vahnin , Golou pandih nimi , nu .
Hänell oli tožo iminkummaine elaige , ku pahad mužikad ol’d’ih : häi keuhäd da laškad , vai tühjät hohotetah da , suarnat kus kundeltah .
Sigä sutkat pidägäh , ka ištuttih da kundel’t’t’ih nu .
Poige oli hänel Mikku , toin oli Ontuoi i tütär oli Maša , kolme oligi .
A häi iče oli nainu Čarniemez , Maksimas , Maksimounakse kirguttih , vot se ühte pereloimut Fed’an , Miikkulihk olihäi , se Maksimounaks kirguttih , Ouduoičii nu .
Siid oli nainu .
Nu a siit kačo paha putti da iminkummin , da kai eigo voinu kodit sroida , eigo voinu ni midä , lahotukuz eli igän kaiken nu .
Siid Maša kuharkuoičči lidnaz ainos .
Da vie oli poige Osippe , Osippe tožo lähti iäres , Krasnarmeiskuoile sroii oman kodin .
Daže lidnaspiäi tulet tännä midä d’er’ounaspiäi , ka priglašaičči kaikkit peldoššikuoit , kodin sroii .
A Maša oli Os’kal miittumal liennöu miehen tožo , zavodii tägä hüvin elädä .
A Ontuoi ei lähtenü enzimäi da Miikkul lidnah , elämäh muga elettih siit .
Ontuoi nai Čarniemes , otti Fadim Man’an taluois , otti näget .
A Mikku nai Fedoran Il’l’an otti , Il’l’an tüttären .
Nu , vot siid hüö siit omas kodis elettih da kai eigo d’agettuheze eigo midä , üks prostuoi , toine vie prostembi .
Eigo tiettü ni midä eigo burlakuoita muga siiten da ka .
Nu a siid Mikku se lähti lidnah burlakakse , dai akan otti sinnä .
Sid heill oli Vas’a , Golovan Vas’akse kirguttih , Golovan Vas’a .
Nu a siid lähtedih burlakakse .
Sid Vas’a se kuoli , siid Mikku kuoli , nu siid Anni se sig üksin eli .
Nu a siid entiä kui Anni se sigä oli uborščičannuvai mis , ainos se Maksimouna mušteli , muatuška , skluaduz vai entiä kuz oli uborščicannu siit ku skluadu .
Sigä huavot kuadutahhäi sill Annile piäle , siid Anni sinnä kuoli ...skluaduiden huavuoiden neniden alle , nu .
A siid vie i lähti Ontuoi tožo lidnah burlakakse Miitr’ounankera : ”Enämbi sanou en rubeda täz elämäh , paniškattih naloguoid da kai a ruada et ”.
Ka naloguoit pandah , pidäiž ruata , naloganpanijad ielo viärät , sanou ni midä da .
Siid hüö lähtedih sinnä kaikin Golou , se Ontuoi dai Man’a .
Dai se otettih muamo , muamo se Maksimouna sinnä .
Siid elettih Lobanal , tuas gorotke on , Lobanal elettih d’uuri nečen Lososinkaz randaz .
Siit ku tulemme müö tännä midä dielot , pidäu la tiedustai Ouduoičii .
Se ainoz minun lapsit kačuoi , kous staruuha kuoli .
Sanou nüg oliiž hüvä elädä ka sanou : ”Vilu on pertiz elädä , se Ouduoičii sanou , vill on pertti еj ole sanou omam moine ”.
A heill oli , kačo , muste päčči .
Siit ku topitahhäi sigä küläs ...kai ku nečiz olišhäi ...kui sanotah , ende sanottih vai čerepänad muga elettäh .
Entiä miittumad i čerepanad oldah , muga sanottih .
Ku noges da lämminou , ka ej ole ku külüz oližit .
”Ku oliž endižes pertiz elädä , Ignat’ouna , sanou ka nügü ...”
A siit kačo hüö vie bokperttikuluine sroittih sih , da muga sih d’ouduttih .
Da muga sih i lahovuttih daže lahuoid ni ken ni ostanu ei , siih i kuaduttih da lahovuttih , vot heiden elaige i .
Kai siit muga iminkummin kai bestolkovuoit .
Golovat
карельский: людиковское наречие
Южнолюдиковский (святозерский)
Дом Голован
русский
«