Тексты
Вернуться к списку | редактировать | удалить | Создать новый | Статистика | ? Помощь
Sil’mienristindy
Sil’mienristindy
карельский: ливвиковское наречие
Коткозерский
Ennen
rahvas ruadopäiviä ei propustittu .Kai päivät oli čotal , konzu midä ruadua .Sil’mienristu piettih suovattan ehtäl .Brihan vanhembat kučutah ristižiä t’outan kele , rist’oidu diädän kele i kylyn jäl’geh lähtieh ženihänke sil’mii ristimäh .
Andilahan talois jo huondekses varustetaheze : pastetah pyöräkkyö , šipal’niekkua , keitetäh studenii .Kučutah andilahan rist’oidu i ristižiä .Pertih tullah jo julgiembasti : sulhaine enzimäženny , vanhembat hänele jälles .Molitaheze suureh čuppuh , luajitah kaikile tervehys i ištutaheze laučale .Brihan tuatto i zavodiu paginan : "Andilahan se kozičiimmo poijale , ga midäbo annatto priduanoikse "?Andilahan tuattah vastuau : "Ga annammo lehmän , lambahan , samvuaran ".Vie pakitah kanua , zirkalo .Konzu gu priduanois ei luajitaheze , ga i svuad’bu leviey .Sen jäl’geh brihan muamah rubieu lahjoi kyzymäh : minule puaru , rist’oile puaru , ristižäle paidu i štanat , buat’koile pielus , hurstiine , paidu i štanat , vellile paijat , sizärile i nevesköile kouftat .Vie diädölöile i t’outile lahjat pidäy .Kodvu riäditäheze lahjois , kai kičevytäh keskenäh .Keyhy andilas perehen polvilleh sordau : pidäy dostali lehmy tanhuos andua , a vaza kodih jättiä .Opitah tarita vazua , ga brihan vanhembat ei sinnepäi ni paišta .
Konzu gu kai paginat priduanois i lahjois perävytäh , ženihän muamo luvettelou , äijygo hengie tulou kodžile , lujužile , äijygo rodieu druškua i sajannaištu .Andilahan omat iččeh rovule lahjua ei kyzytä : annetanneh hyvä , ei annetanne , ga muga , vai sanotah , min verdo roih myödäšty .
Sen jäl’geh nostah seižoi obrazoin edeh , molitaheze , andilas kumardah jalgah omale tuatale i muamale , a siten ženihän kele brihan tuatale i muamale .Andilahan muamo kumardah jalgah uvvele tyttären muatkoile i pokoroiččeheze , gu ei abeittaš tytärdy .Kaikin ištutaheze stolah juomah i syömäh .Uvvet svuatut ollah suures čupus .Gostimindu menöy puoleh yössäh .Vie pakitah valkua , ližoidu i senke lähtiäh kodih .
Toššupäivän andilas keriäy veičoran .Kuččuu kai hierun tytöt , soittajan i ehty pläšitäh lansua da kadrielii , "kylvetäh čuuruu ", a briha ištuu andilahan kele laučal i kačotah , kui tytön jäl’gimäine ehty vesselästi menöy .Svuad’bu pietäh kolmes päiväs .Jo sil’mien ristijes paištah : suovattan – kodžat , pyhänpiän – lujuot , ezmäššarren – venču .Nedälil andilas kävelöy omua roduu myöte svuad’bah kuččumah , a ehtil tytöt kerävytäh priduanoidu ombelemah .Ommellah uuzi töppyžil kuvottu od’d’ualu , paltinhurstištu , enzi kylyh sulhažele kuadiet da paidu , kruavatile zuavessi .Ženihy kävyy joga ehtiä andilahalluo , tytöt miäräilläh kaglustu paidah , kuad’evyödy .Andilahan vanhembat hommatah keitoštu , pastoštu , viinua , puatokas keitetäh metty , valmehekse ostetah lahjoi .Kodžäpäivän suovattan andilahan rist’oi on andilahan talois enzimäine abuniekku kaikes .
Sil’mienristindy
карельский: ливвиковское наречие
Коткозерский