Тексты
Вернуться к списку | редактировать | удалить | Создать новый | Статистика | ? Помощь
Bukina Valentina . Liipukku
Bukina Valentina
Liipukku
карельский: ливвиковское наречие
Новописьменный ливвиковский
Kerran
buabo lugi Mašale suarnan "Kaži suappualois ".Bunukkua ylen äijäl miellytti , kui L’udojedu — rahvahien syöjy muutui leijonakse da hiirekse .
Maša rubei pakiččemah buabua :
– Muuta minuu keneksetahto .
Buabo enzimäi ei tahtonuh nimittuzii muutoksii , ga Maša ylen äijäl pokoroiččihes , sit buabo rubei duumaimah : "Keneksebo sinuu muuttua ?Gu leijonakse – sinä minuu syöt , a gu hiirekse – sit sinuu kažit syvväh , da sit minä en voi sinuu järilleh muuttua tyttözekse ".
A Maša sanoi :
– Muuta minuu liipukakse .Minä rubien pertii myöte lendelemäh , kukkazil istumah , sinuu omil siibil kut’kuttamah .
Mugai sovittih .Buabo sanoi tiedohussanat :
– Beks , feks , peks .Muutu Maša liipukakse .
Silmänlipahtukseh tyttöine hävii , a pertis rubei lendelemäh liipukku .Hänen siivet oldih taivahankarvazet , sendäh gu Maša oli sellinnyh taivahankarvazeh pluat’t’ah enne muutandua .
Čoma liipukku lendeli pertii myöte , istavui kukkazile libo buaban olgupiäle da ikkunale .Buabo kodvan kačoi , kui Maša-liipukku ilomieles lendeli pertii myöte , da jälles lähti murginua šeimimah , a liipukku lendeli , lendeli pertii myöte , da sit lendi pihale ikkunas .
Mašale-liipukale ylen äijäl himoitti pihal lennellä , anna lapset kačotah čomua taivahankarvastu liipukkua .
Lapset , vaigu nähtih liipukan , tahtottih sen tavata .Hyö juostih liipukale jälgeh da kirruttih :
– Se tuanne lendi , tavakkua , lykkiä sih šuapku !
Yksi brihačču juoksi kodih ottamah verkostu .Hyvä , gu buabo kuuli lapsien kirrundan , da lähti pordahile kaččomah , kedä lapset tabaillah .
Čomaine taivahankarvaine liipukku vadvaihes yksielpäi toiziele , sit brihačču lykkäi verkoizen da tabai liipukan .
Buabo rubei kirgumah :
– Älgiä koskekkua liipukkua , andakkua se minule .
Brihačču koppai verkospäi liipukan , kai siivet revitti da andoi buabale särizijän liipukku-rukan .Buabo varavozeh kämmenis kandoi liipukan kodih , pani sen koikale da sanoi tiedohussanat :
– Beks , feks , peks .Muuttu liipukku järilleh Mašakse .
Liipukku kerras hävii , a jäviihes Maša .Tyttöine äijäl särizi da jygieh hengitti väzyndiä .Hänen taivahankarvaine pluat’t’u oli revinnyh , sendäh gu brihačču revitti liipukan siivet .Buabo alevutti Mašan , pezetti händy , sellitti toizeh čomah pluat’t’azeh da sanoi :
– Nikonzu emmo rubie muuttumah ni kenekse !
Liipukku
карельский: ливвиковское наречие
Новописьменный ливвиковский
–
–
–
–
–
–
–