Texts
Return to list | edit | delete | Create a new | history | Statistics | ? Help
Kuren tа revon starina
Kuren tа revon starina
Karelian Proper
Uhta
Оli ennein
kurki ta repo .Ollah kurki ta repo tai kävelläh šielä , kävelläh , vielä kuomakšiksi luatiuhutah .Repo kuččuu kurkie kostih .Tai mänöy kurki kostih .Mänöy , ta repo ei muuta kuin kauhasella šemmosella lautasella panou keittuo ta iče šyöy lippuau .Kurki raiska takou , takou , takou šiinä nenälläh , nо mitähän šuau !Elä i huoli .
– Tule , kuoma , huomena miun luo kostih , – šanou , – mieki kostitan vastah hyväsestä .
Repo läkši mielissäh , šuoriu ta mänöy repsottau .Hiän ei muuta kun pyöhtimeh maitolintua .Iče šyöy kurki vetäy , а repo raiska nuoli , nuoli laitoja ta sen kera niin pois pitäy hänen lähtie ."Kyllä mie vielä tällä kurella konstin tiijän ka ...".
Tai šen keralla juoksi meččäh tai termärintaseh , päiväpaistoseh pyörähti muate šelälläh .Kurki matkuau šieltä , mistä halonleik kuusta matannou , ka kaččou : "Voi-voi , kun on repo-kuoma kuollun , vuota hoti , tuota , maistelen kieltä ".Kun rupesi šitä kuot’t’elemah , ka šilloin repo i sahvatti :
– Oho , puutult šie kostittaja kiini !
– Elä , kuomaseni , elä kuomaseni , ei tällä keinoin , – šanou , – kuren lihoja hauvota .
– A miteinpä hauvotah ?
– Ka kun kuto ennein , – šanou , – tuattoni vakan hyvin vällän-vällän ta kattien vielä väl’l’emmän , – šanou , – ni šiitä termän piällä kun , – šanou , – mäni , šiitä kun pačkasi mänömäh , – šanou , – termän alla , nin šielä oikein hyväksi kuren lihat hautu .
Repo puumeččäh .Mäni puumeččäh repo tai šielä äherti , šal šita lissettä ta kuto vakkasen ta – vakan vällän , kattien vielä väl’l’emmän .Kun pani ta mäni termän piällä , nakrau , ajattelou , jotta "kyllähän nyt kuren lihat hautuu ".Kun rytkäi mänömäh , ka vakka kahallah ta kurki lentoh !Šanou :
– Šiinä šiula , repo-kuoma , – šanou .– Repo viisaš-viisaš , a kurki vielä viisahampi !
Paha mielestä i tuli revolla kyllä : "Ei tule i mitä , vielä lähen uuveštah promišľah ".Mänöy , kaččou – puušša on pešäni .Varis raiska istuu šielä poikasien luona , hänellä on nellä pojaista .Tai alkau hännälläh kolkuttua , kolkuttua .
– Ka mitä sie , repo-kuoma , tiälä kolkuttelet ? – sanou .
– Ka kačon puuta šukšekšeni , lymmyštä lykätäkšeni . Täš ois hyvyä šukšipuuta .
– Elä , kuomasen , miula vet on pojat !
– Kun antanet yhen pojan šyyvä , ni en katkua , en leikkua .
Eläpä šouva .Varis lykkyäy hänellä poikasen , tai repo juokši poikeš .
Toisena piänä alko himottua , tai mäni šaman puun juureh .Tuaš i kopšuttau hännälläh .Toini :
– Mitä šie , repo-kuoma ?
– Oi , kačon puuta šukšekšeni , lymmyštä lykätäkšeni . Täštä šuau hyvät šukšihuavukset .
– Elä , kuomasen , kun miula vet on pojat tiälä , ni ...
– No kun yhen pojan antanet , ni kyllä mie heitän tämän .
No , hiän tuas pačkuau toisen pojan .
Repo juokšenteli voitavah ta sen kera tuas mäni šaman puun juureh .
– Ka a-voi-voi , johan mie šiula olen kakši poikua antan , mitä šie ?
– Ka nyt kuan , ihan heti , kun et antane !
Hiän lykkäi kolmannen pojan , ka ...lentäy se kurki .
– Tule , kuomasen , proskeniella , šyöy ni miun , – šanou , – repo , tuota , kun poikaseni on kaikki šyönyn , ei ole kuin yksi , – šanou , – miulani jiänyn täh ...
– O-o , – šanoг , – kun šie olet tyhmä , – kurki šanou . – Millä hän kuatau ? Nyt kun tulou , – šanou , – ni šano vain niin , jotta "šuuhus kuššah , repo-kuoma : šiula eikä ole veistä , eikä kirvestä , hännälläs hätyyttelet ni ...Täh sanah ...ta kun kyšynöy , jotta ken juohatti , ni šano , jotta kurki-kuoma juohatti .
Niin še i kävi .Repo kun pyörähteli , nälästy , ka mäni livahti , tuas koluuttau .
– Mitäpä šie sitä – šanou , – koluutat ?
– Ka puuta šukšekši , lymmyštä lykätäkšeni , – šanou , – täštǎ šuan hyvät šukšet .
– A mäne i , – šanou , – repo-kuoma , – šanou , – šiula eikä veistä eikä kirvestä , – šanou , – hännälläš häilyttelet , miulta poikaset šöit , ka viimestä et šyö , – šanou .
– Ken juohatti ?
– Ka kurki-kuoma juohatti tai ...
– Vain vieläkö še kurki-kuoma kerran kostihini kerkiey , ka kyllä mie sillä maksan !
A kurki lentäy tuolla pitin taivasta liputtau , tai repo vain tyhjin šuin istuu .
Kuren tа revon starina
Karelian Proper
Uhta
–
–
–
Сказка о журавле и лисе
Russian
–
–
–