Texts
Return to list | edit | delete | Create a new | history | Statistics | ? Help
Kiššalan linnan prinšešša
Kiššalan linnan prinšešša
Karelian Proper
Uhta
Eli
ennen ukko ta akka .Heil oli yks tytär .Akka i kuolou ukolta .Ukko lähtöy toista akkua eččimäh .Tulou Šyöjätär vaštah ta kyšyy :
– Mistäkä , ukko , tulet ? Minne , ukko , mänet ?Ota milma akakšeš .
– En ota mie Šyöjätärtä .
Ukko mänöy ielleh , Šyöjätär mänöy ielleh .Juokšou Šyöjätär poikki polvelta ja kyšyy :
– Minne ukko mänet ?
– Akkua eččimäh , – šanou ukko .
– Ota milma akakšeš .
– Eikö tiälä muita ole kuin Šyöjättärie ?
No još mle šiun otan , kun muita ei ole .
Šyöjätär šanou :
– Mäne kotihis , mie tulen jäleštä , käyn vain prituanieta ottamašša .
Ukko mänöy kotihis .Šyöjätär tulou jäleštä , hänellä on prituanieta vain kakši tytärtä .Ne on , kuin rupiskokunat .Ukolla on niis tytär .
Aletah šiinä elyä .Šyöjätär rupieu vihuamah ukon tytärtä .Syöjätär ottau vettä stauččah ja käšköy ukon tyttären juuva .Toiset tyttäret šanotah :
– Elä juo , še on pahua vettä .
Ukon tytär šanou :
– Ëi miula pie vettä , mie en juo .
Šyöjätär luou tyttären šilmilllä šen vejen .Tyttärellä rupesi šiitä vačča kašvamah .Hiän tuli raškahakši .Šyöjätär šanou ukolla :
– Šuata pois tämä tytär .Tämä kun on kyläššä juoksija , nin šai maran ičelläh .
Ukko šanou tyttärelläh :
– Šuorie , tyttären , lähemmä meččäh .
Tytär arvuau , jotta nyt hänen tuatto tahtou viijä tapettavakši .Läksi ukko tyttärineh pimieh šynkkäh meččäh .Hiän jättäy tytärrukan meččäh , iče lähtöy pois .Tytär jiäy šinne itkömäh .
Luatiu meččäh ičelläh pikkaraisen pirtin ja alkau šiinä elyä .Šai kiššanpoikasen .Še rupei pakajamah , kun oli ihmiseštä šyntyn .Se kyšyy :
– Etkö šie , muamo , vois mitä neuluo , mie läksisin linnah myömäh väikka čuarin pojalla , emmäkö šais jauhuo .
Tytär neulou kaunehen käsipaikan puun juurista .Šitou šen kiššanpojan kaklah ja käšköy viemäh čuarin pojalla , jotta eikö antais jauhuo .
Kišša viey ja šanou :
– Kiššalan linnan prinšešša käški tämän tuomah šiula ja kyšy , jotta eikö olis antua jauhuo .
Čuarin poika ihmettelöy , kun käsipaikka on niin kaunis .Šitou kiššalla kaklah pienen jauhopuššin ja laittau muamoh luo .(Tytär oli kiššanpoikua kieltän šanomašta muamokši , vain käški šanomah Kiššalan linnan prinšeššakši ).
Muamolla tuli paha mieli , kun čuarin poika mielty šiihe käsipaikkah .Ja rupesi pelkyämäh , jotta čuarin poika voipi tulla kaččomah , a hänellä on pieni kekälehistä luajittu pirtti .
Yhtäkkie tytön šilmih ilmešty hänen kuollut oma muamoh ja antau tyttärellä pikkaraisen šulkkupaikan ja käšköy lyömäh ristih , jotta tulis paremmat huonehet kuin čuarilla .Tytöllä tuli huonehet paremmat kuin čuarilla .Tytär neulou kaunehen paijan , šitou kiššanpojalla kaklah ja käšköy viemäh šen čuarin pojalla kostinčakši .
Kiššanpoika juokšuttau čuarin pojalla paijan ja šanou :
– Täššä Kiššalan linnan prinšešša työnši paijan šiula kostinčakši .
Čuarin poika kirjuttau kirjasen ja panou kiššanpojalla kaklah šen .Šiihe on kirjutettu , jotta Kiššalan linnan prinšešša tuliš käymäh .Čuarin poika tahtou nähä , mimmoni še on , kun ošuau šemmosie neuluo .
Kiššanpoika viey šen tytöllä .Tytär šuorieu hyvih vuatteih .Kiššanpoika lähtöy iellä juokšomah , jotta näyttäy , missä on čuarin koti .Tytär mänöy čuarih .Čuarin poika šanou sisärelläh , jotta "mäne kävelemäh tämän tytön kera .Još hiän likapaikoissa noštau helmojah , niin šilloin še on mualaisie , još ei , niin šilloin še on prinšešša ".Kiššanpoika kuuli ja kuiskuau muamollah : "Likapaikoissa elä nošša helmoja ".
Niin hyö lähettih kaupunkilla kävelemäh čuarin tyttären kera .Tytär kualau mahtavašti , niinkuin ainaki herrašväki ja čuarin tytär , eikä lekahuta helmojah .
Tullah kotih , čuarin poika kyšyy sisäreltäh :
– Mitein käveli ?
Sisär šanou :
– Niin še käveli kuin mieki , ei še noštan helmojah .
Čuarin poika tuaš šanou sisärelläh , jotta "kun käymmä muate , niin pane olkie alla .Još še tietäy , jotta on olkie , niin še on Kiššalan linnan prinšešša ".
Kišša kuuli ja šano muamollah :
– Huomenekšella kun kyšytäh šiulta , kuin makasit , niin vaštua : "Muiten oli hyvä muata , vain niin oli kuin hirret alla ".
Pantih tytär muate ja olkie lakanan alla .Tyttö makuau yön šiinä .Huomenekšella noššatetah vierašta murkinalla .Čuarin tytär kyšyy :
– Miten oli , čikko , muata meilä , oliko hyvä vain paha ?
Kiššalan linnan prinšešša šanou :
– Hyvä oli muiten muata , vain niin olis niinkuin hiršie ollun kylkeni alla .
Čuarin poika kyšy tuaš sisäreltäh ja uško , jotta kyllä še on Kiššalan linnan prinšešša .
Čuarin poika šanou :
– Mie tuleh silma käymäh moršiemekšeni .
Tyttö mänöy kotih .Hänellä on koti niinkuin čuarilla .
Čuarin poika mäni šulhasikše , toi moršiemen ja kiššan toi mukanah .Kiššalan linnan prinšešša löi šulkkupaikallah , jotta Kiššalan linnan huonehet kavottais pois .Šiitä hyö alettih čuarissa elyä .
Šen pituni še .
Kiššalan linnan prinšešša
Karelian Proper
Uhta
–
–
–
–
–
–
–
–
–
–
–
–
–
–
–
–
Принцесса кошачьего замка
Russian
–
–
–
–
–
–
–
–
–
–
–
–
–
–
–
–