Тексты
Вернуться к списку | редактировать | удалить | Создать новый | История изменений | Статистика | ? Помощь
Pedri-cairi
Pedri-cairi
карельский: людиковское наречие
Южнолюдиковский (святозерский)
Saldatte
lähtöw meččäh ohotale i yöstyw .I Pedri-cairi ohotimmaz oli , i Pedri-cairil on hebo .Yhtyw saldattah :
– Terveh , – sanow , – služivuoi .
– Terveh , terveh , – sanow .
– Midäbo sinä tägäl ?
– Minä , – sanow , – yöstyin .
– A sinä midä ? – sanow .
– Kai minä yöstyin .
– Ka , – sanow , – yöstyit , ka edgo voi nosta puuh ?
Saldatte sanow :
– En voi minä nosta , minä olen ylen äijäl väzyny , edgo sinä voi nosta kui ?
Pedri-cairi rubei nowzemah puuh , a saldatte kaččow : hänel on kl’ankušši sadulin torokas .
Saldatte sanow :
– Nygyöi , surme-kalme , pidäw oppida , midä on ?
Ot’t’ , ka viinad , hyväd .Häi ryyppäiži hyvän ves’s’elän .Heittiheže Pedri-cairi puws , saldatte kyzyw :
– Viego midä nägyw ?
– Vot nägyw , – sanow , – kodi ylen ogromadnuoi mečäs .
Otetah hyö napravlenii .Mändäh , puwtutah gluhuois mečäs kaksid’-atuažahižeh kodih .Mändäh pertih , on yksinäh staruuha .
– Anda , – sanow , – babuške , meile syödä .
– Ei , – sanow , – ole meil , dit’onok , ni midä syödä .
– Kui , – sanow , – ei ole ni midä syödä nengomas taluois , – sanow .
Fattiw päččilawdan , avaidaw päčin , ga gus’s’e padas .
– Kačo , – sanow , – sanod , vanhe ristitty , ei ole midä syödä , a on gusse tukkunaine padas . Leibäd , – sanow , – tuo , babuške .
– Oi ei ole , – sanow , – želannuoi , leibäd .
Saldatte avaidaw čulančikan , ka leibäd on virši .Ottaw leibän tukkunažen , kandaw stolale , rubetah syömäh .Syödäh mi pidäw .Saldatte sanow :
– Syö , dovarišše , vačče täyz nygyöite .(Häi ei tiedä vie , što cairi on ).
– Nygöi anda , – sanow , – buabo , meile osoblivuoi , spokuoi meile otdi̮haita .
– Vot , – sanow , – mängäd ylähäkse čardakkah , vierkätte magata .
Mändih hyö čardakkah .Cairi uinoži , a saldatte ei voi magata .Häi otti cairil sabl’an ičelleh kädeh i duwmaičow : "Täs emme hyväs kohtas magada ".Rodiihes ehte , hämärdyškänzi .Rodiiheze alahakse pagin .Buabuške kyzywgi poigil :
– Viego , poigat , midä suaitte tänäpäi ?
– Emmo , muamo , suanu ni midä tänäpäi .
– A vot minä suain , kaks mieste on ylähän čardakas .
Hypnii nuorin poige :
– Oh , – sanow , – lähten minä , terväh heid rešin .
Vaiku čokonii piän , saldatte sabl’al vedälzi : piä pakui , kui kapustekerä .Toine sanow :
– Midä häi šigä vie tolkuinnow ?
Hypnii i toine vel’l’eh .Ehtiw piän čokaita , saldatte sabl’al i vedäldäw – i piä pakui , kui kapustekerä .Kolmas tägä sanow :
– Mändih i vai tolkuitah šigä , ei ruata .
Hypnii sinne – ka piä pakui , kui kapustekerä iäres .Kuwndelow , ka enämbi ei kuwlu ni kedä , tuli spokoino .Tulow huondes , i nostattaw :
– Nu , tovarišše , nowze iäres , pora meile lähtedä iäres .
Nowzelzi Pedri-cairi .
– Vot , tovarišše , – sanow , – minä uinonnužin , ka i sinä uinonnužid igäkse – tägä , kačo , kolme piäd on .
Lähtetäh alahakse , saldatte sanow :
– Kus teiden kazne on , ozuta .
– Ei ole , želannuoi , meil , – sanow , – ni miitutte kaznad !
– Kui , sanow , – ei ole teil ? Ed ozutanne , ka piän leikkadan !
– Vot , – sanow , – želannuoi , läkkä ozutan .
Mäni , viei ambarih .Ambaris on sundug rawduoil lyödy pečatnuoit syl’te .
– Nu , avaida , babuške , sundug .
Avaidaw sundugan , sundug täwz kuldad da hobd’ad .Pedri-cairi i sanow saldatale :
– Vot , saldatik , ota sinä min voined kandada , a minule ei pidä , minul on omad kuldad .
Saldatte panow kai kormanit täwdet .
– Vot , – sanow , – staruuha , ozuta meile nygyöi dorog , kunne pidäw puwttuda .
Staruuha otti , vedätti heid tropinkale , saldatte punaldiheze , vedäldi cairil suabl’an nožnas i vedäldäw staruuhal piän .
– Ei ni sinud pidä , pahad , muale diättädä .
Tuldah hyö hyväh dorogah , ottaw cairi bumagad i peron i kir’uttaw kuldaižil bukvil bumagan i andaw saldatale i sanow :
– Tule nengomal aigal , nengomah kohtah minulluo .
I sanow :
– Tämän bumagan kera mene kunne tahto kabakkah , trahtierih , jamščikuoilluo , ni kus ei pidä den’gad maksada .
Prostiiheze , lähti cairi .Häi mäni trahtierih , zakažii kaikenn’ytytte viinad , zakuskad .Ozutti bumagan – ni midä ei pidäny .Häi mänöw stancaih , ottaw troikan hebod , kelloluois ajaw .Ozuttaw bumagan , ei oteta den’guod .
Häi toižeh trahtierih mänöw , trebuičow kaikennyttymäd viinad , kaikennyttymäd zakuskad i mi vai oli rahvaste , kaikkid d’uotti .Bumagan ozutti , ni midä ei otettu .Mänöw toižeh stancaih . Kuuž hebod zakažiw , kuudel hebol ajaw , bumagan ozuttaw , ni midä ei oteta .Häi mänöw linnah , stolicah , trebuičow kaiken kallehimbat viinad i zakuskad i d’uottaw kaikkid , mi vai on trahtieris rahvaste .
D’uohtui mieleh : "Minud kučuttih nengomah kohtah , nengoman päivän , pidäw mändä sinne nygyöi ".Häi ku mäni sinne , kunne kučuttih – ka dvorcah carskuoih .A cairi da carica vuotetah hänte , häi käden nosti , čestin luadii :
– Izven’ait’e , imperatorskoje veličestvo , ja pjanuoi .
– Ničego , soldatik , – sanow .
Fatittih yks kädes , toine toižes iččeh zualah carskuoih .Ištutettih keskeh , carica čurah , cairi toižeh .
– Midä , – sanow , – saldatik , pidäw sinule nygy ?
– Minule , – sanow , – ei pidä ni midä , vai ku uvoli minut krepostnuois pravas !
Otti cairi , kuldaižil bukvil kir’utti uvoln’enijan , što uvolittih sinut krepostnuois pravas .Saldatte piäzi krepostniekannu i hänen kai korenii piäzi .
Pedri-cairi
карельский: людиковское наречие
Южнолюдиковский (святозерский)
–
–
–
–
–
–
–
–
–
–
–
–
–
–
–
Царь Петр
русский
–
–
–
–
–
–
–
–
–
–
–
–
–
–
–