Тексты
Вернуться к списку | редактировать | удалить | Создать новый | История изменений | Статистика | ? Помощь
Petr Pervoi ennen ečči ravejimaa heboo
Petr Pervoi ennen ečči ravejimaa heboo
карельский: ливвиковское наречие
Видлицкий
Petr Pervoi ennen
ečči ravejimaa heboo , kudai enimäl d’uoksiš .Häi meni gu dielon peräh sepällöö heboo ravvoittamah , a sepäl oli ylen hyvä hebo .Meni seppy , potkovan valmisti i lykkäi sih vilustumah .Petr Pervoi ottaa sidä potkovaa käis pyörittää dai oijendaa , sanoo :
– Kiitetäh , hyvä seppy olet , no vai aiga lahoo potkovaa laait !
Häi ei virka ni midä . Ottaa laadii uvvet – dai hevon ravvoittaa .Ravvoitestu andaa Petr Pervoi hobd’ahižen rubl’an .Seppy ottaa pyörittää dai keskel katkaa d’en’gan i sanoo :
– Moine i saari olet , gu lahoo d’en’gaa tuot !
Saari kyzyy :
– Sanotah , sinul on ravei hebo ?
– On kudakui .
– Edgo lähe minuu vedämäh , nengoine i nengoine matku on , kolmekymen virstaa čaasus pidää d’uosta .
Jeeželi ed voine vedää srokal , sid sinulles palku häviää dai muite nyt laaduo rodiah .
Seppy sanoo :
– Lähten .Tol’ko anna minul aigaa , hebo on lasketettu , kepit pidää tagua .
Häin tagoo kolme keppii i panoo kreslah viizitoštu puudaa raudaa .Istutahez kreslah i lähtietäh ajamah .Saari sanoo :
– Onnakko hävität palkan , dai iččedäs , hil’l’ah tämä hebo kävelöö .
Seppy ottaa , ravval išköö heboo , i hebo ravenoo – d’uoksoo .
Yksi perelesku päästih .Lähtietäh , toine ajetah .Opät’ saari sanoo :
– Onnaako hävität sinä palkan dai iččeedäs hävität – ylen hil’l’ah menöö hebo .
Häi ottaa toižen kerran išköö toižel kepil , hebo i yččästähes i davai d’uoksemah .Päästäh toine perelesku .
Lähtietäh viimisty perelieskaa ajamah .Saari kaččoo čassuloih i sanoo :
– Nygöi onnaako hävität palkan dai iččeedäs , ylen vähä aigaa on .
Häi ottaa išköö kolmanden kerran , išköö heboo , i hebo lähtöö d’uoksemah i puoldu čassuu ielle tuloo määrättyh stanssiessah .
Saari lähtöö kreslas i kyzyy :
– Äijängo sinun hebo maksaa ?
Seppy sanoo :
– Se ei ole myödävy .
Saari kyzyy toižen kerran .Opät’ vastaa seppy :
– Ei ole myödävy .
Saari kyzyy kolmanden kerran :
– N’eužeeli hindaa hevol ei ole ?Minä annan , ota min tahtonet .
Häi sanoo :
– Ved’ kerdu on sanottu , se ei ole myödävy .
Saari sanoo :
– N’eužeeli sinä nyt saaril ed myö ?–ottaa i hevon ambuu da palkan maksaa , mi oli määrätty .
Seppy lähtöö pahas mieles linnaa myö kävelemäh .Kävelöö kabakkoi myö i kuz vai nägöö ribuhižii kird’uniekkoi i vai heidy ugoščaiččoo .Sidä raadaa mondu kerdaa .Eräs siä on ravei kird’uniekku i kyzyy :
– Midäbo sinä meidy nygöi d’uotat da olet pahaz mielez ?
Häi sanoo :
– Vot on minul mittuine obiidu .Minä toin saarin i meil oli rääditty hindu .Nečen vastah oli matkaa i toin viä puoldu čaassuu iele nämietittuu aigaa .I häi kyzyi , äijängo otan hevoz .Minä vastain : "Ei sе ole myödävy , se on kodihebo ".Kolmandengi kerran kyzyi , minä en andanuh , häi otti da ambui hevon .
– Ole huolettah , – sanoo kird’uniekku , – osta buti̮lkku viinaa , mene osta gerbovoidu bumaagaa listu .
Ottaa i kird’uttaa prošeenijan .Käjel kird’uttaa , sid toižel käjel kird’uttaa .Ottaa i varbahal podpiššihez .
– Nygöi palkaa prošenijan viejy .
Häi menöö eččii viejän i maksaa palkan , i se lähtöö vedämäh .D’o toššupään ečitäh händy , kučutah suudoh .A kird’uniekku sanoo :
– Nygöi häi maksaa hevoz ,ga elä vähembää rääji , gu mi vai hevon nahkah syndyy hobd’aa da kuldaa .
Mennäh suudoh , i saari kyzyy :
– Äijägo otat ?
Häi sanoo :
– Mi hevon nahkah menöö kuldaa da hobd’aa .
Hänen pidi maksaa .Seppy otti da vie tänäpäi bohattannu elää .
Petr Pervoi ennen ečči ravejimaa heboo
карельский: ливвиковское наречие
Видлицкий
–
–
–
–
–
–
–
–
–
–
–
–
–
–
–
–
–
–
[Петр Первый и кузнец]
русский
–
–
–
–
–
–
–
–
–
–
–
–
–
–
–
–
–
–