Тексты
Вернуться к списку | редактировать | удалить | Создать новый | История изменений | Статистика | ? Помощь
Pappi
Pappi
карельский: ливвиковское наречие
Ведлозерский
Vot
hyvä-horošo , lähti ennen pappi kazakkoa eččimäh .Nowzi hevol selgäh i ajaw dorogoa myö .Tulow mužikku vastah .
– Drastui , boat’ušku !
– Drastui !
– Kunne , boat’ušku , menet ?
– Menen kazakkoa eččimäh !
– Ota minuw .
– Mi on nimi ?
– Niikoi .
– Ei peä minul Niikoloi , – i pappi lähti ielleh dorogoa myö ajamah .
A Niikoi meččeä myö d’uoksi i därilleh papil vastah :
– Drastui , boat’ušku , kunne ajat ?
– Ajan kazakkoa eččimäh !
– Ota minuw .
– Mi on sinul nimi ?
– Nimi – Niikoi .
– Ei peä minul Niikoloi , – i lähti ielleh ajamah .
A Niikoi toas d’uoksi ymbäri meččeä myö i kolmanden kerran tulow papil vastah .
– Drastui , boat’ušku , kunne menet ?
– Menen kazakkoa eččimäh .
– Ota minuw .
– A mi on sinul nimi ?
– Nimi on Niikoi .
– Ga hyvin teäl moal on Niikoiloi !
– Meijän moal – ota minuw libo älä – kai on Niikoi nimellizet .
– Ga siit en lähte heboo ajelemah , otan sinun .
Äijängo otat vuvves ?
– Sovimmo , – sanow kazakku , – min andanet , sen i otan !
Mendih hyö kodih .Pappi syötti , d’uotti , i ruvettih hindoa loadimah .
– Minä , – sanow kazakku , – en äijeä ota , vai kolme plikkuw vuvves !
Pappi ihastui .
– Tämä , kačo , on mies olluh – sanow papad’d’al .
– N’enga huogehel rubiew olemah .
No mugai loaittih hindu .Kazakku rubei sluwžimah .Sluwžiw , roadaw , aivin kyzyw :
– Midä , boat’ušku , roan ?
Kazakku rubei tävvel sydämel roadamah , ga pappi d’o ei voi ni roavol täytteä .Pappi primiettiw , kui kazakku roadaw .Kaččow , kazakku hos min dygien ottanow , ga kebd’ei on kai .Pappi d’o varajamah rubei , d’o emändän kel pagizow siä , tolkuiččow :
– Eäre hävitteä pideä kazakku , – tolkuijah keskenäh .
Kazakku kyzyw :
– Midä , boat’ušku , tänäpäi roan ?
– Ga tänäpäi pidäw häkki iškie , – sanow pappi .
– Kuwzi vuottu syötimmö , d’o syöndän heitti , menöw pillah .
Mene sinä nosta häkki sarail , a minä sil aigoa pal’l’an varustan iškie .
Kazakku meni kon’ušših , tabai häkin sarves i veätti sarail .Pappi da papad’d’u sidä dieluo kačotah ikkunas .Pappi tuli , pal’l’an keski sarajanlattiel lykkäi , iče därilleh pertih .Kazakku kirgai :
– Tule , boat’ušku , tänne !
Tuli sih pappi .Kazakku sanow :
– Tule , boat’ušku , piä sarves häkkii , a minä išken .
– En tule , Niikoi-poigu , en : sinä midä voinnet roa , pal’l’u nečis on !
Niikoi sanow :
– A midäbo pal’l’oi täl pidäw ,– iče plikkai oččah häkkii kerran , häkki sih kipsahtih .
Nägi sen pappi , ga vie ielleh hänel vačču täwdyi .Häkki se puwtui iškie , lihat suolattih kai hyvin .Papil da papad’d’al on vačat tävvet , hyö Niikoidu varatah , i aivin hävitteä duwmaijah .Niikoi opät’ kyzyw papil :
– Midäbo tänäpäi , boat’ušku , roan ?
– Ga nečis aijas rawdazet vorotat ollah , ota täs suičet i tuo hebo kodih .
(А sе oli kondii ).
Meni kazakku vorotoin luo , kaččow : tämä hebo ewle nämih suiččih otettavu .Häi meni pajah i laitutti ravvas suičet , sadulin i pletin .Niijen kel meni sinne , vorotat avai i läheni kondieh päi .Kondii suwn avai , vai hawkata händäh , ga kazakku oččutukis tabai , nirzat moah painoi i sil välỉl suičet peäh sydäi .Siit veätti vorotoil , sidoi kiini i sadulin selgäh pani .Hyppi da kopsi siit kondii , ga d’owdi , lujih käzih puwtui .Siit selgäh nowzi i davai aijas ajelemah , davai lyömäh dа uččimah .Kaččow , d’ongoi rubei händy kuwndelemah da ellendämäh , ku kirguaw : "tprru " – i seizattuw , ku kirguaw "nu-u-u " – i lähtöw juoksemah , a iče aivin pletil selgäh andaw .
Kaččow , što d’o hyvin kuwndelow , siit avai vorotat , i lähtöw kodih ajamah .Ajoi papin pihal , hevon paččahah sivaldi , d’uoksi pertih .
– Nu , kunnebo , boat’ušku , hevon panen ?
Pappi muga pöllästyi , ga toizien heboloin keskeh työndeä käski .Häi i työndi .Meni d’uottamah , ga d’o papin hevot höwrytäh , tappanut kai kolme .Tulow kazakku pertih , sanow :
– Boat’ušku , sinun hevot kai on koadunuot , vai höwrytäh , yksi vai minun hebo on d’alloilleh .
– Nečis ku yhteh panimmo , – sanow pappi , – eriže pideli panna .
– Ga kui , boat’ušku , käskiit , ga muga i paniin .
Pappi da papad’d’u keskenäh diivoindellahes :
– Ku häkin käis pidi , dai kondies vallan otti , ga nygöi tappaw i meijät .
I hyö vie duwmaijah työtä händy kalah moizeh därveh , kus kolmelkymmenel sylel vedehiine hengel därveh ottaw .Kazakku val’l’astaw kondien d’elegäh , ottaw kirvehen keral i lähtöw .Menöw .Rubiew vedämäh sinne , häi vie teriämbäh juoksow hongan luo i davai leikkuamah , iče lugow :
– Därven rupitan , vedehizen riputan .
Vedehiine kuwli , tuli hänen luo i sanow :
– Midä sinä , nengaleite čakkuat minuw da riputtoa tahtot ?
– A sidä , – sanow , – kaloa pideä , kalat mene tuo kai därves , štobi̮ kai kalat oldas rannas !
Vedehiine hyppäi därveh , kalat kai ajoi randah .
– Vot , – sanow , – kai kalat täs ollah !
– Nu , gruwzi delegäh , – käsköw vedehiizel .
Vedehiine rubei gruwzimah , a sil keskie vie kala hyppäi därves .
– Kačo , – sanow kazakku , – vie kaloa därveh däi !
– Ga lapsil keitteä dätteliin kolme kaloa , – sanow vedehiine .
– Ni midä , – sanow , – i net mene tuo !
Vedehiine hyppäi i net kalat toi .Kalat gruwzie puwtui delegäh .
– Nu vot , – sanow kazakku vedehizel , – ištoi laijal heboo ajamah , – a iče istuihes peräh .
Vot ajettih papin pihal . Vedehizen kaloin kel dätti pihal , a iče juoksi pertih .
– Kunne , boat’ušku , kalat panen ?
Kalat sain .
Pappi hänelleh vastai :
– Pane sarail , aja delegän kel sarail .
Sarail ajettih , i vedehizen pani kaloa puhkoamah .Kolme sorokovoidu puččii rodih kaloa !Papil ni mi ewle mieldy myö , ni mih ei ihastu , aivin vai duwmaiččow , ku vois mil hävitteä kazakan .Papad’d’an kel paistah keskenäh :
– Nygöi ni mil muwl ei hävie , nygöi pideä työtä valgieh soarih velloilleh , valgei soari sinne hävittäw .
Kazakku kyzyw hänelleh :
– Midäbo nygöi , boat’ušku , roaduo annat ?
– Vot , – sanow , – valgei soari otti minus kolme sadoa vellakse , mene kävy velloilleh !
Häin kondien val’l’ahih , vedehizen laijal – i lähtieh ajamah .Ajettih soarin dvorčah , hevon sivaldi vorottoih i vedehizen dätti karaulimah .Händy sinne časovoit laskemah ei ruvettu , häi veräidy potkai ielleh .Menöw toizih dežurnoloih , kolmandih , yksikai kaikis ielleh menöw .Dälgimäizeh dežurnoih meni :
– Nu , kudas komnatas soari eläw ?– kyzyw hänel .
– Nečis eläw , – ozutti saldattu , i häi meni sinne .
Sinne menöw soarin komnattah , zdorovkaittihes .
– Nu , midä , poigane , tuliit ?
– kyzyw soari .
– A tuliin velloilleh , täs bumoagu , – sanow kazakku .
Kačoi soari bumoagan i n’evvoi :
– Mene sed’moih nomerah , sie annetah sinul vellat .
Häi meni sinne , avai uksen , kolmepeähine zmija hyppäi hänel vastah – vai hawkata .Häi kaiken sen trepaičči .Astuw därilleh soarin luo , sanow :
– Vot , valgei soari , miittumah tilah työnnit velloilleh , syödäväkse , ga nygöi iče syöjät ollah valmehet !
Meni soari kaččomah – ga tozi .
– Vot , – sanow soari , – kirjah ku et malta , ga ni nomeraa et tunne .
Ei pideli sih nomerah mennä .
– Ga menen minä i toizeh , – sanow kazakku , – anna vai bumoagu .
Soari bumoagan kirjutti i toizeh nomerah nevvow .Menöw toizeh nomerah kazakku , avuaw uksen , ga sie kuwzipeähine zmija häneh hyppäi – vai ku hawkata .Häi kaiken sen trepaičči .Därilleh astuw soarin luo , sanow :
– Vot , valgei soari , kui sinä velgoi maksat , syödäväkse työnnit , ga syöjät nygöi ỉče valmehet ollah !
Siit soari rubei velgoi maksamah , varavui – vai peästä hänes eäre .Kuwzi sadoa andoi , sanow :
– Kolme sadoa velgoa oli i kolme sadoa procenttoa annan d’engoin piendeä .
Ajoi häi d’engoin kel kodih .Ajetah därven kohtassah , i vedehizel sanow :
– Mene kodih .
Vedehiine ihastuksis hyppäi därveh .Niikoi-kazakku ajoi papin kodih , vellat toi , sanow :
– Kolme sadoa andoi vellat i kolme sadoa andoi procentat .
Opät’ pappi duwmaiččow papad’d’an kel :
– Ni kunne ku ei häviä , neče on čuwdo !Nygöi ičel pideää kois pajeta , hyllätä hänel kodi .
Hyo varustetah mollettiloil šallut , pannah sinne evästy vähäine i d’engusuma šalguh kriepitäh .Kazakku tiedäw , što lähtieh eäre pagoh , i häi meni papin šalguh .Vot i yöl nostih , tietäh – nygöi kazakku uinoi muata , šallut selgäh i davai pagenemah eäre .Hyö d’uostah , d’uostah , varatah , ku ei tabuas heidy , väzyttih äijäl .
– Davai huogavummo , – sanow pappi papad’d’al .
Dai kazakku lasketti :
– Dai minä huogavun .
Hyö ielleh d’uoksemah .D’uostih , d’uostih , opät’ i väzyttih .
– Davai huogavummo , – opät’ sanow pappi papad’d’al .
– Dai minä huogavun !
– sanow kazakku .
Hyö ielleh d’uoksemah .I kolmas kerdu terväh d’uostih pieneh därvirandah .
– Nygöi-taki tänne ei tule , – sanow pappi papad’d’al , – davai täs huogavummo .
– I minä huogavun , – laskettaw kazakku .
Hyö muwdu ni midä ei voidu , ku vai hypättih vedeh : "Ehki omin käzin surmu roih , yksi-kai meijät tappaw "!
A kazakku keräi d’engat i lähti kodih i vie nygöi nečie eläw bohatannu .
Pappi
карельский: ливвиковское наречие
Ведлозерский
–
–
–
–
–
–
–
–
–
–
–
–
–
–
–
–
–
–
–
–
–
–
–
–
Поп
русский
–
–
–
–
–
–
–
–
–
–
–
–
–
–
–
–
–
–
–
–
–
–
–
–