Тексты
Вернуться к списку | редактировать | удалить | Создать новый | История изменений | Статистика | ? Помощь
Laiska tytär
Laiska tytär
карельский: собственно карельское наречие
Вокнаволокский
Оli ennen
ukko ta akka .Heilä oli yksi tyttö .Ukko kuoli .Tyttö oli hyvin kaunis , vain niin laiska , jotta ei šuateta i mihi töihi .Akan pitäy häntä kyšymällä elättyä .Kerran tulou akka kyšymäštä .Niin haukkuu tytärtäh , jotta kaikki hirvie , kun ei ole kehan hoti vettä käyvä , vain kuikualla muata luhmottau .
Čuarin poika matkuau mečäštä , nin kuulou , kun elämä kuuluu talošta .Hiän mänöy kaččomah , jotta mitä šielä on .Tyttö vain öhöttäy kiukualla .Čuarin poika šanou :
– Mitä šie papatat tiälä ?
– Ka mitä mie en papata , – šanou akka , – kun tyttö niin ruatau , niin ruatau , jotta kun tuon kyläštä liinua värčillisen , nin päiväššä kesryäy .
Kerkieis vielä vanhempanaki nuo voimah mänettyä .
Eletäh tuaš päivie , ta tuaš akka kun rupieu tyttyö haukkumah , miks ei kehtua ruatua , nin čuarin poika tuaš ni šattuu tulomah .Akka tuaš kiäntäy , jotta "šitä haukun , kun en millänä šua töillä täytetykše ".Čuarin poika arvelou , jotta pitäy tulla šulhisekše , kun on noin ruataja ta kaunis .Ošti kaikki hyvät vuattiet tai kävi tytön .Akka jäi hyvilläh , kun ošasi valehella .
– Emmä , – šanotah , – vielä häitä pie , kun on muita piiruja enšin , šiitä jäleštä piemmä hiät vašta .
No toiset kun lähettih piiruloih , nin tytöllä kannettih liinavärčči eteh , jotta "kesryä nyt šillä aikua , kun toiset lähtöy piiruloih ".
Tytöllä hätä käteh .Hiän itkömäh , kun ei šuata i yhtä kesrätä .Tuli oikein kauhien näköni akka ta šanou :
– Ku häihi kuččunet , nin mie šiula kesryän .
Tyttö lupuau kuččuo , ta hiän kesryäy liinat ta panou vyyhet nuakloih .Akka mäni matkahaš .
Piiruloista tulijat ihmetelläh hyvilläh , jotta "johan meilä nyt šattu kesryäjä ".Та tuaš toisena piänä kun lähetäh tai tuuvah tuaš värčillini kesrättävyä .Tuli toini akka , vielä kauhiempi , ta šanou , jotta "häiheš kun kuččunet , nin kesryän ".Tyttö kyšyy , jotta "mistäpä teitä šuau kuččuo ?"– nin akka n’euvou :
– Kujanšuušša on kallivo , kopahuta vain kallivoh , nih myö tulemma kallivon alta .
Niin akka hänellä tuaš kesryäy .Piirumiehet ollah tuaš hyvilläh .Šamoin kolmantena piänä hänellä tuuvah tuaš kesrättävät , ta nyt kolmaš kaikkein kauhein akka ne hänellä kesryäy .Tuas piirumiehet ollah mielissäh , jotta ei minne šuaha .
Tai luajittih hiät .Šanotah , jotta "kuču šie heimokuntaš , kun ollou ketä ".
– On miula , – šanou tyttö , – kolme tätie , mit pitäis kuččuo , vain ne ollah oikein hirvien näkösie .
No kumminki kun käšetäh kuččuo , nin hiän mänöy ta kopahuttau kallivoh , ta šieltä tulla viuhahtau täti .
Šanou akka , kun tulou pirttih , jotta "en mie voi istuo enkä aštuo , kun jalka ei pie yhtänä pravešua ".Šitä jalkuah potkiu .
– Mipä šiula šiinä on ?
– kyšytäh .
– Ka kun olen ikäni kesrännyn , nin polkiessa on tämmösekše männyn .
"Ahah , – arvelou čuarin poika , – empäi pane akkuani kesryämäh enämpi , kun näin pahakše mänöy jalka ".
Tuli toini täti kal’livošta .Šillä kun käsi pieksäytyy ta šormet primpettäy jotta ...
– Ei miušta ole vierahakše , kun ei pisy käsi paikallah , – šanou akka .
– Mipä šiula šiinä on ?
– tuaš kyšytäh .
– Ka kun ikäni olen kesrännyn , nin šentäh olen tämmöni .
Čuarin poika tuaš ni kuulou .
Tulou kolmaš täti .Še kielelläh nuolekšiu ta piekšäy šitä .Šanou :
– Kun ikäni olen nuollun rihmoja kesräteššä , nin ei pisy kieli paikallah .
Čuarin poika arvelou , jotta "en ijäššäh anna akkani kesrätä , kun tuommosekše männäh ".Niin piäsi tyttö , jotta ei tarvin kesrätä enämpyä ni konša .
Laiska tytär
карельский: собственно карельское наречие
Вокнаволокский
–
–
–
–
Ленивая дочь
русский
–
–
–
–