Тексты
Вернуться к списку | редактировать | удалить | Создать новый | История изменений | Статистика | ? Помощь
Kukko kiekuu
Kukko kiekuu
карельский: собственно карельское наречие
Кестеньгский
Oli
ennen ukko ta akka , elettih kahen .Hyö oltih oikein köyhät .Ukko oli niin vähätöini : ku missä työššä hiän ni kävi , ei hiän , ni mitä šuanun , ei ni mitä tuonun kotih .
Šanou ukko akallah :
– Nyt vain , akka , piäššä milma herroih hyrehtimäh , jumalalla laulamah .
No ukko läksi koistah .
Tulou jumalan koti , šielä linnut lauletah , šielä on kaikenlaista lintuo .Jumala pani šen ukon paččahalla istumah ta kiekumah .
– Nyt šiun on kolme vuotta kiekuttava kuin kukolla : "Kukko kiekkuu , kukko kiekkuu , kukolla on kultaset kenkät , a kuninkahalla ei ni sviettua ". Kun kolme vuotta kiekut , ni šuat palkoikšeš kultaset kenkät , hopieset paklat .
Kulu kolme vuotta , annetih ukolla kultakenkät , hopieset paklat .Ukko läksi kotihenša .Aštu , aštu .Tuli mieš vaštah , hevoista vetäy , kyšy ukolta :
– Mistä , ukko , matkuat ?
– Matkuan jumaloista laulamašta , herroista hyrehtimäštä . Šielä kulu kuuši vuotta , šeisoin šeiččemen kešyä , šen kaiken kahekšan vuotta .
Mieš kyšyy ukolta :
– Mitäkä šie šait palkkua ?
– Šain palkkua kultaset kenkät , hopieset paklat .
Mieš šano , jotta "etkö vaiha heposeh niitä kenkie "?
– No vajehettih .
Läksi , hevoista vetäy ukko .Tuli toini mieš vaštah , lehmyä vetäy .
Lehmänvetäjä kyšyy :
– Mistä , ukkoseni , vejät hevoista ?
Ukko vaštuau :
– Olin jumaloissa laulamašša , herroissa hyrehtimäššä .Šielä kulu kuuši vuotta , šeisoin šeiččemen kešyä , šen kaiken kahekšan vuotta .
– Mitä šie šait palkkua ?
– Šain mie palkkua kultakenkät ta hopieset paklat .
– Etkö , ukko , vaiha niitä lehmäh ?
– Mie olen vaihtan ne jo heposeh .
– Etkö vaiha hevoista lehmäh ?
– No vajehettih .
Niin ukko vaihto heposen lehmäh .Läksi ukko lehmyä vetämäh ielläh .Vetäy , vetäy , ta tuaš tulou mieš ukolla vaštah .Mieš vetäy lammašpokkuo .
Mieš kyšyy :
– Mistä , ukkoseni , lehmyä vejät ?
– Olin mie jumaloissa laulamašša , herroissa hyrehtimäššä . Sielä kulu kuuši vuotta , šeisoin šeiččemen kešyä , šen kaiken kahekšan vuotta .
– Mitä šie šait palkkua ?
– Šain palkkua kultaset kenkät ta hopieset paklat .
– Etkö , ukko , vaiha niitä pokkoh ?
– Mie olen ne vaihtan heposeh ta heposen olen vaihtan lehmäh .
– Etkö šie , ukko , lehmyä vaiha lammašpokkoh ?
Niin vaihtau ukko lehmän lammašpokkon .Lähtöy ukko ielläh aštumah .Tulou mieš vaštah , koirua vetäy .Šitte vaihtau ukko lammašpokon koirah .Šitten koiran vaihtau kiššah .Та kiššan vaihtau sierah .Läksi ukko aštumah šiera kiäššä .Tuli lampi vaštah .Kaččou – šiinä lammissa kakši šoršua uiksennellah .Loi ukko šoršie šieralla tai ei ni ošan .Та läksi kotih kävelömäh , ta marššiu ukko kotıh .Akka kyšyy ukolta :
– Missä olet , ukkoseni , näin kotvan ollut ?
Ukko šanou akalla :
– Olin jumaloissa laulamašša , herroissa hyrehtimäššä .Kulu šielä kuuši vuotta , šeisoin šeiččemen kešyä , šen kaiken kahekšan vuotta .
– Mitäpä šait , ukko , palkkua ?
– Šain palkkua kultakenkät ta hopieset paklat .
Akka rupei jalkojah pešömäh .Ukko kyšyy :
– Miksi , akka , nyt jalkojaš pešet ?
– No kultakenkie panetella .
– Jo mie vajehin ne heposeh .
Akka rupieu tallie sroimah .Ukko kyšyy :
– Miksi , akka , tallie luajit ?
– Ka hevoista pityä .
– Ka jo mie heposen vajehin lehmäh .
Akka partta luatimah .
– Miksi , akka , partta luajit ?
– Ka lehmyä pityä .
– Jo mie lehmän lammašpokkoh vajehin .
Šitten akka šointa luatimah .
– Miksi , akka , šointa luajit ?
– Ka lammašpokkuo pityä .
– Ka jo mie pokon koirah vajehin .
Akka allašta luatimah , akka allašta luatimah .
– Miksi , akka , allašta luajit ?
– Ka koirua šyöttyä .
– Ka jo mie koiran kiššah vajehin .
Akka rupieu toista allašta luatimah .
– Miksi , akka , allašta luajit ?
– Ka kiššua šyöttyä .
– Ka jo mie kiššan sieroih vajehin .
Akka veiččie ta kirvehie eččimäh .
– Miksi , šie , akkasen , kirvehie ta vieččie ečit ?
– Ka hivon sieroilla , jotta tultais terävemmät ta näpiemmät .
– Ka jo mie sieroilla šoršie lammissa loin .
Akka kattilua pešömäh , akka kattilua pešömäh !
– Miksi , akka , kattilua pešet ?
– Ka šoršie keittyä .
– Ka en mie ni ošannu .
Akka kauhalla-kapussalla ukkuo piäh , akka kauhalla-kapussalla ukkuo piäh !
Šen pivuš še starina .
Kukko kiekuu
карельский: собственно карельское наречие
Кестеньгский
–
–
–
–
–
–
–
–
–
–
Кукареку
русский
–
–
–
–
–
–
–
–
–
–
–