Texts
Return to list | edit | delete | Create a new | history | Statistics | ? Help
Kladbiščala lähtietäh
Kladbiščala lähtietäh
Karelian Proper
Padany
Nyd lähemmä
kui t'ässä jo ,
kukaz (i ) moakundani kui kerävyttih ,
oi kukkahani mamaženi , siuda
jo kukkahih spoaššuzih kuutaidaviksi varoin ni ku .
N'yd läkkeä vai , kalliž moakundani ,
otakkoa polvi mamažešta polven aiguhižet polviproškenjažet
polvi spoaššuzih lähtijessä .
Eigo mimmoizija t'eilä prostoiloja protivnostišanazie ažetellun ,
ni otakkoa polvi spoaššuzih lähtijessä proškenjazet .
I anakkoa valgeil (a ) ilmoila loadijala
valgijala mamažela polnoit odblahoslovenjažet dai proškenjažet .
Ved jo kalliž moakundani jo kallehih synd'yzih
kaimoamah varoin tuldih ni ,
ku n'äinä päiväzinä pehmeih peškuzeml'azih joi pereberaičimma .
I vet kalliž moakundani , kalliž l'ubiimoi mamaženi ,
kallehih syndyzih kaimoalemma
i pehmeih peškuzeml'azih pereberaičemma .
Ni onnoako jo et , kukkahani mamaženi ,
kurja rukkazilani ni kuila aigazila enämbi ni ,
kuldarindakubukägözien kukunda kuuhuot kuin ollah ni ,
edgo rubiele kurja rukkazila ni hoš
kuuročkalinduzien loaduzin kukkumah ,
kuin ollah kukkahien spoaššuzien blahoslovimat
kuldarindakubukägözien kukunda kuuhuot kuulovišša ni .
Mie rubielen angehen oalani varduoni ,
armaz mamaženi , sield'ä siuda arvottelomah .
Kuin tulet kukkahih spoaššuzih kui kuutaičemma ni ,
kui kuivila kuuženokšažila
kuldarindakubukägöžet kukkumah ruvetah ni ,
mie angehen oalane varduoni , armahani mamaženi ,
siel'd'ä rubielen siuda arvottelomah .
Ni kui rojitah oallon peällizien allilinduzien ažetuškuuhuod ni ,
angen rukkaženi rubian , allilinduzina kuin ažettuated ni ,
angehen oalane Val'arukka
sieldä rubian siuda arvottelomah .
Ni kui rodieten magei magavopostelizih vieren ni ,
edgo , udalani mamaženi , hoš
udalista spoaššuzišta uduzih unipoduškazih kui ,
ylen userdno uinuan ni , hoš unuzissa učudaiččiete .
Ni onnoako kui armaz moakundani siuda
armahih synd'yzih ažetellah že ni ,
onnoako ni kuih manierazih siuda
olovat spoaššuzet ei odblahoslovita .
Ni läkkeä vai n'ygöi n'äi kui ,
jo ollah doštalitti , jällinjälgimmäižetti ,
posledn'oid minuuttakodvažet
olovan hyväžen azetettuloišša onttarizišša ni .
Jo ollah , mielikirjavani mamaženi ,
minuuttazila meäräijyd minuuttakodvažet oldah vie .
Ni kui kalliž moakundani siuda n'äin'ä päiväzin'ä
kaunehiže kangažmoahuzihe kaimatah ,
en'ämbi et kurjarukkazila ni kušta kuvatteliete .
Ni vet otakkoa , polvi moakundani , jälgimäni kerdani
polvi päiväzist'äni lähtijessä pobiednoilda mamarukalda ,
ana polnoit proškenjažetti ,
ana hyvät odblahoslovenjažetti .
Ana omaz učlivoimat umažet udra rukkazila ni ,
udalia ilmazia myöten ollešša .
Vet onnoako en'ämbi ei armahan mamažen armozia
ni kušta šoa eččiä hoš .
Kuih manierazih näidä dorogazia ,
kuottelizima hoš kuih manierazih ,
libo viiruččija libo viikuppija ni .
Ei šoa kargia rukkazila ni hoš ,
omat kapitoalažet n'äista dorogaizišta ,
siuda kuottelizima kaupata .
Ni ei ole semmoizia kapitoalazija ,
eigo hoš oliš kaznan kapitoalazila
n'äistä dorogazišta , otmeniitoi mamaženi , siuda odbeija .
Ni onnoako ni mih manierazih ei šoa ,
ni kuottelizin hoš , kurja rukkaženi , kukkahani mamaženi ,
ennen kukkahih spoaššuzih kuutaindazija ,
hot loadu spoaššuzien kera kuin loadizin hot suudožed ,
ni kui loadu spoaššuzet loadima rukkaistani
yksilä laudazila laššetta .
Ni šurendo rukkaženi loadizin
sugeijen spoaššuzien kera hoš suudožed ni ,
ei šoa ni mih manierazin , otmeniitoi mamaženi , siuda
n'äista dorogazišta ni kuih manierazin odbeija .
Yhed vai kallehih spoaššuzih pidäy kannotella .
En voi ni kuih manierazin oslobodija ,
ni hoš olizin , kargie rukkaženi , kalliž mamaženi ,
siula karžinah kanoavažed loadinun da sin kattanun ni .
Hoš kargie rukkaženi olizin kallehin proaznikkazin ,
armahani mamaženi , siun armozie eččimäh sen aštunu .
Ni voata vai kui kaunehiže kangažzeml'azih
n'äin'ä päivin'ä kaimoalen ni ,
en'ämbi ni kušta en šoa eččia ,
eigo , armaž mamaženi , siuda ni kušta šoa arvottoa .
Yhed vai kargie rukkazilani ,
kallehih syndyzih kaimoatah .
Ni voata vielä , kuin ollah kallehih syndyzih kaimattuloja ,
oi kalliž mamaženi ni ,
kuin on olovih syndyzih okuutaiduloja
yn'n'äh puoli ozra osmerikan oalaista omazija ni ,
eigo , valgeil (a ) ilmoila loadija valgijani mamaženi ,
siula valgeista synd'yzistä ne vaštazih voaputtoa .
Ni kuin on vahahernehin valujien voskovoiloijen
tuohušsvečkazien kera kuin
valgeišta syndyzistä heilä valdažet annettanou ni .
Ana siuda valgeih syndyzih vaštoamah tullah .
Ni voata vielä vierona rukkaženi ,
viihyt't'äjazieni lapšut kuin on
viihyt't'ämien ažetettuloila vierahila randazila viestittömänä .
Ni kuin eigo hoš kuinn'ägi arvottelis
aigojazieni lapšud armahan mamažen
azeida n'äid'ä .
Ni kuin hot ažettaližin tuuvan enžimäzijä
tuulen viemä vietrazija myöten
viihyttäjäzieni lapšuola viestižet hoš kuin vierettäzin ni .
Onnoako hoš šiivekkähilä siivilinduzila selgäzih sidozinni ,
ana aigomažeš aigomien luohizila
loittozila randazila siun nämä aziežet arvotteliš .
Što myö jo jälgimäžen kerdažen
armašta mamaista armahih syndyzih aššuttelemma .
I viezlöveä mamaista jo viekkahih spoaššuzih vierettimä .
Joi kallehih kladbiščazeml'azih joi katakšendelemma ,
pehmeih peškumoahuzih pereberaiččima .
(Lien'öy .)
Kladbiščala lähtietäh
Karelian Proper
Padany