Тексты
Вернуться к списку | редактировать | удалить | Создать новый | История изменений | Статистика | ? Помощь
Elettii uk da ak. Oli heil’ kolme tytärd
Elettii uk da ak. Oli heil’ kolme tytärd
карельский: людиковское наречие
Среднелюдиковский (мунозерский)
Elettii
uk da ak .Oli heil’ kolme tytärd .Läht’ ižä meččäi ruadamai , a emä diäi kalitoid paštamai .
Ižä i sanuw emäle :
– Kalitad paštad dai työndä mille palavid !
Emä paštoi kalitad dai työndäw nuorimbad tytärd viemäi ižäle kalitoid dai nakažiw hälle :
– Mäned , mäned , tulow kakš dorogad .Šiid ringu kudamai dorogai tulda .
Tytär i läht’ .Mänöw , mänöw , muga i on , tulow kakš dorogad .Hän i ringuw :
– Kudamai dorogai tulda ?
A dorogad ned oldii : ykš kulddorog , toine ligadorog .Hälle linduine ringuw :
– Kulddorogai , kulddorogai tule !
A kondii ringuw :
– Ligadorogaỉ , ligadorogai tule !
Kondii ringuw d’alombi čiurušt , ka neičukaine i läht’ ligadorogai .Mäni , mäni ligadorogad myöi . Tuli pertiine , hän šihi pertiižei i mänöw .Ku mäni – pertiš kondii händäi taboit’ , karžinai pani , iče kalitad i šyöi .
Tulow ildal ižä kodii suur’ , akale sanuw :
– Mindäi palavid ed työndäny mille ?
A ak sanuw :
– Työnžin nuorimbad tytärd myöi , no hän ni iče ei tulnu kodii .
Yö magattii .Opät’ ižä lähteškäž meččäi dai nakažiw akale :
– Tänäpäi štobi̮ työndä kalitoid .
Iče i läht’ .Ak opät’ paštaw kalitad dai työndäw tošt tytärd kalitoid viemäi i nakažiw :
– Mäned , mäned , tulow kakš dorogad , ka šinä ringu , kudamai dorogai tulda .
Tytär i läht’ .Mänöw , mänöw , tulow kakš dorogad .Hän i ringuw :
– Kudamai dorogai tulda ?
Hälle čiuruine ringuw :
– Kulddorogai , kulddorogai tule !
A kondii ringuw :
– Ligadorogai , ligadorogai tule !
Kondii ringui d’alombi , ka neičukaine i läht’ ligadorogai .Mäni , mäni dai puutui kondijan pertiižei .Kondii se händäi taboit’ , karžinai pani , a kalitad iče i šyöi .
Tulow ižä ildal mečäs suur’ i sanuw akale :
– Mindäi mille kalitoid ed työndäny ?
Ak sanuw :
– Ka työnžin vet’ d’o tošt tytärd myöi , ka ni iče opät kodii ei tulnu !
Duumaittaw , kunne heil’l’ d’o toine tytär kadoi .Magattii yö .Huonduksel opät’ ižä lähtöw meččäi dai nakažiw akale , štobi̮ palavid hälle työndäiž .Ak opät’ i paštelow kalitoid dai työndäw ukole d’o vahnimad tytärd myöi i nakažiw opät’ hälle :
– Mäned , mäned , tulow kakš dorogad , ka šinä i ringu , kudamai dorogai tulda .
Tytär i läht’ .Mäni , mäni , ka tulow i kakš dorogad , neičukaine i ringuw :
– Kudamai dorogai tulda ?
Čiuruine hälle vastai ringuw :
– Kulddorogai , kulddorogai tule !
A kondii ringuw :
– Ligadorogai , ligadorogai tule !
Kondii ringui d’alombi , ka neičukaine i läht’ ligadorogai .Mäni , mäni dai tuli pertiine , hän sihi pertiižei i mäni .Kondii se händäi taboit’ , karžinai pani , a iče kalitad i šyöi .
Ištutaw kai sizareksed karžinas i duumaittaw , mite nygy kodii piestä .A kodis ižä da emä tože tuužitaw , it’kedäw , kunne heid’en tyt’täred kadottii .
A kondii vahniman tyt’tären pani emändäksi .Hän kondỉjale keit’täw , paštaw da sizarile andaw .Kondii päiväkši kävyi meččäi ičelle šyömišt eččimäi .Vot vahnim sizar’ i vi̮dumoič , mite kodii piestä , sanuw sizarile :
– Minä teid , end’žimäi yht šiid tošt panen havadoi da työndän kondijad viemäi meile kodii tatale da mamale goščinččad .
Tulow kondii kodii , ka emänd se i sanuw hälle :
– Huomen ku tuled mečäs piäi , ka pordahil lienöw havad goščinčoidenke , se šinä vie meile kodii mamale da tatale goščinčad dа pordahile lykäidä , a minä ištuzen katoksele da rubedan kaččomai , edgo sinä avaida havadod da syö .Vai rubenned avaimmai havadod , dai ringun !
Kondii sе i soglassizow .Tošt päivän vahnim sizar’ panow nuoriman havadoi dai view pordahile , a iče nouzow katoksele dai ištuzow šinne .Tulow kondii mečäs piäi , nägöw , havad on pordahil .Ottaw havadon šel’gäi dai lähtöw viemäi .Kandoi , kandoi dai duumajiw : "Äijän midä liene pannu , dyged on kantta , vuota vai minä kačon , midä sigäl on ".Rubež havadod riiččimäi , a neičukaine kaloksel piäi i ringuw :
– Minä nägen , šinä šyödä tahtod goščinčad , vie edelläi !
Kondii kaččow , ka hän ištuw katoksel , dai lähtöw edelläi viemäi , ei ni kačo , midä on havados .Mäni , mäni , da kodin pordahile i lykäiž havadon , a iče d’uoste tagaze meččäi .Ižä da emä ihastuttii , što heile pordahile tytär tuodii .
Toižen päivän vahnim sizar’ opät’ i sanuw kondijale :
– Tänäpäi opät’ ku tuled mečäs piäi , dai ota havad pordahil goščinčoidenke dai vie mamale da tatale , a minä ištuzen katoksele .Vai rubenned riiččimäi havadod , minä nägen dai ringun .
Opät’ muga že ruadoi : toižen sizaren pani havadoi , šidoi havadon i viei pordahile , a iče nouž katoksele .Kondii tuli mečäs piäi , ot’ havadon šel’gäi i läht’ viemäi .Kandaw , kandaw dai duumajiw : "Midä liene on d’alo dyged , vuota vai kačon , midä on havados "!Dai rubedaw riiččimäi havadod , a neičukaine i ringuw katoksel piäi .Kondii i heit’täw riičindän i lähtöw edelläi viemäi , ei ni kačo midä havados on .View ižän da emän pordahile dai lykäidäw havadon , iče i d’uoksow meččäi .Ižä da emä tuldaw pordahile , ka d’o toine tytär kodii tuli , vie dalombi ihastuttii .
Kondijannu on vai nygy ykš sizarekšis , vahnim ,i duumajiw , mite nygy ičelle piästä kodii dai viidumaiččow : ombelow tobd’an mučakon , ištuttaw katoksele , a iče mänöw havadoi .Tulow kondii ildal , opät’ muga že ottaw havadon šel’gäi dai lähtöw viemäi .Kandaw , kandaw dai duumajiw : "Midä liene tänäpäi on vie dygedembi , vuota vai kačon , midä on havados ".Ku rubedaw heit’tämäi havadod šel’gäs piäi , ka neičukaine i ringuw havados piäi , a kondii se kaččow katoksile piäi i duumaiččow , se ištuinik i ringuw , dai lähtöw edelläi viemäi .Opät’ i view i lykäidäw kodii pordahile .Emä da ižä d’uostaw pordahile , ka šigä d’o vahnim tytär , d’alo ihastuttii , što kai tyt’täred heil’l’ nуgy kodis .
A kondii mänöw kodii dai ringuw mučakole :
– Tule katoksel piäi iere !
A mučak ni liikahta ei .Hän opät’ i ringuw :
– Vai et tulne šigä piäi iere , ka tulen šinne i d’alo lyön , pergan surmile !
A mučak se ni liikahta ei .Kondii nouzow katoksele , ottaw mučakon , šylgöw da lykäidäw alahakše .
Muga neičukaižed i muanitettii kondijad .
Elettii uk da ak. Oli heil’ kolme tytärd
карельский: людиковское наречие
Среднелюдиковский (мунозерский)
–
–
–
–
–
–
–
–
–
–
–
–
–
–
–
–
–
–
–
–
–
–
–
–
[Медведь и три сестры]
русский
–
–
–
–
–
–
–
–
–
–
–
–
–
–
–
–
–
–
–
–
–
–
–
–