Тексты
Вернуться к списку | редактировать | удалить | Создать новый | История изменений | Статистика | ? Помощь
Sinipetra
Sinipetra
карельский: собственно карельское наречие
Вокнаволокский
Oli
ennen ukko ta akka .Ukolla ta akalla oli poika .Šiitä poika šanou muamollah ta tuatollah , että hiän lähtöy naimah .Šiitä hiän ottau naisen .Eletäh naisen kera niin kauvan , että šyntyy tyttö .Šiitä häntä käšetäh puapuo käymäh : ken tulou vaštaħ , ei ottua šitä .
Aštuu tuon pitkyä tämän łyhyttä , tulou hänellä Šyöjättäri vaštah , šanou :
– Tiijän , tiijän , kunne mänet !
Še šanou :
– Tänne mänen .
Šyöjättäri vaštuau : ota häntä puapokše .
– Stukoi-stakoi , en ota šilma puapokše !
Mieš ielläh aštuu , tuaš Šyöjättäri poikki polvelta hyppyäy , tulou vaštah , šanou :
– Tiijän , tiijän , kunne mänet , ota milma puapokše .
Šiitä häntä mieš ottau puapokše .Šiitä hiän tulou puapon kera kotih .Šiitä ottau še lapšen , puapuiččou .Šiitä mänöỹ ottau rošenčan , työntäy mereh petrakše vierömäh .Iče rupieu rošenčakše .Šiitä lapši itköy , ei šyö vierašta nännie , ei lašta millänä viihytä .
Yksi leškiakka-paimen meččie kulkou .Lapšen äiti noušou mereštä , kyšyy paimenelta :
– Itköykö miun lapšeni , piikuuko miun pieneni , onko herrani murehešša ?
Šiitä šanou paimenella :
– Tuo huomena miula lapši , imetän šen .
Hiän mänöy , paimen , illalla kotih , šanou isällä :
– Anna lapši huomena meččäh , šiitä , – šanou , – koivun lehet kolajau , huavan lehet holajau , petrakarja mereššä vieröy , šitä iapši kaččou .
Šyöjätär šanou :
– Mitä lapši meččäh , ei lapši mečäššä viihy !
Kuit’enki antau lapšen .Paimen viey šamoilla tulilla , kuin eklein oli .Šanou paimen :
— Unikkisen-punikkisen ,
tule lašta , šyöttämäh ,
ihaluaš imettämäh :
ei šyö Šyöjättäriltä ,
eikä juo juojattarelta ,
eikä tuohitötteröistä ,
eikä petkelen nenistä .
Hiän , lapšen äiti , noušou , mereštä ta šyöttäy lašta , päivän on lapšen kera .Illalla paimen ottau lapšen kotih .Kyšyy Šyöjättäri :
– Milläpä lapši viihty , milläpä lapši on näin kylläni ?
Paimen šiitä vaštuau :
– Koivun lehet kolajau , huavan lehet holajau , petrakarja mereššä vieröy , šitäpä lapši kaččou ta viihtyy .
Muamo šanou :
– Tuo lapši huomena , imetän šen , enämpi en niäkkänä .Lähen šuurien šelkien tua .
Huomenekšella lähtöy paimen meččäh , ottau lapšen , viey šamoilla tulilla , kun ekleinki .Tuaš šano :
Unikkisen-punikkisen ,
tule lašta šyöttämäh ,
ihaluaš imettämäh :
eikä šyö Šyöjättäriltä ,
eikä juo juojattarilta ,
eikä tuohitötteröistä ,
eikä petkelen nenistä .
Niin hiän noušou mereštä , luinen [?] tal’l’a korvissa , ta šyöttäy lašta , imettäy .Lapši viihtyy .Šanou äiti :
– Tuo vielä huomena lapši , enämpi en häntä niä , lähen šuurten merten tua .
Paimen tuou illalla lapšen kotih , häneltä tuatto kysyy :
– Millä lapši viihtyy , kun yön hyvin makuau ?
– Šillä viihtyy , kun oma äiti mečässä šyöttäy – šiula on Šyöjättäri naisena , – šanou paimen . – Otan huomena lapšen matkah , ta lähe šie mukah . Šie mäne peittoh .
Šyöjätär kyšyy mieheltä :
– Millä lapši viihtyy mečäššä ?
Hänellä vaštuau :
– Koivun lehet kolajau , huavan lehet holajau , petraparvi mereššä vieröy , šitä lapši kaččou .
Paimen šanou vielä , että "kun huomena mänemmä meččäh , hiän rupieu piätäh šukimah , a mie panen tal’l’an tuleh ".
Šiitä naini šanou :
– Mikäpä käryllä haisuu ?Tal’l’ani palau !
Paimen šanou :
– Ei pala tal’l’aš .
Та miehellä paimen sanou :
– Hyppyä šie naisen šelkäh , šilloin kun mie tal’l’an luon tuleh .
Mies hyppäi ta šano :
– Nyt lähetäh kotih .
Naini šano :
– En lähe Šyöjättären šyötäväkše enkä juojattaren juotavakše .
Paimen viey naisen ta lapšen kotihih .Šiitä mänöy mieš kotihinše , lämmittäy kylyn ta kaivau viittä šyltä šyvän hauvan , viey ruškiella hal’l’akalla Šyöjättären kylyh .Kun avuau oven , nin Šyöjättäri jutkahtau hautah , jošša on tervua ta tulta .Noštau hiän , Šyöjättäri , šormen ta šanou :
– Tuošta tulkah muan toukkaset , ilman itikkaiset !
Mieš ottau paimenelta oman naiseh ta ruvetah elämäh kuin enneinki elettih .Hyövyttih hyrčäkše , puavuttih parčakše , vielä eletäh tänä päivänä ta eletäh huomenaki .Та šiihi še loppu .
Sinipetra
карельский: собственно карельское наречие
Вокнаволокский
–
–
–
–
–
–
–
—
–
–
–
–
–
–
–
–
–
–
–
–
–
Синяя важенка
русский
–
–
–
–
–
–
–
–
–
–
–
–
–
–
–
–
–
–
–
–
–