Тексты
Вернуться к списку | редактировать | удалить | Создать новый | История изменений | Статистика | ? Помощь
Aššukšentelou, aikomaisen
Aššukšentelou, aikomaisen
карельский: собственно карельское наречие
Кестеньгский
Aššukšentelou
, aikomaisen , ankehilla arpateil'l'ä .
Šuorimaisen šuoriel'ou šuurilla šotatiehysil'l'ä .
Ka vet milläkä mie šurento rukka šolukšentelen , milläkä mie kaiho vartuon kualelen , kun kanšateillä kualatetah kannettuisen kaunis kana .
Tuuvittamasen tuhoteillä totutellah , nin missäkä mie rupien tunnon aššukšentelomah , ta kenkä miula rupieu i kulettelomah hot' kuskaleipäsie ?
Veršomaisen vieröy noilla vientäteillä vet ni , en voi vierekšennellä enämpi , kun olen vierryöllä puolella viekašta ikyä .
Kuvamaisen kujin olkuol'ou noilla kuvamien kulkutiehysillä .Ken rupieu hot' kujin aššukšentelomah kulunuolla ijäilä kurjalla vartuol'l'ani ?
Ta aikomaiseni ašettelin arpatiehysill'l'ä aikomien puolil'l'a armahie ilmoja .
Veršomaisen viety on noilla vieroilla vientäteillä , ka en voi ni viekotella vieroil'ta vientätiehysiltä , kun verran yksinäni vierekšentelen noijen veršomien vieroil'l'a työhysillä .
En voi ni vierekšennellä , kun on vierryt ikä vieronalla vartuol'l'ani , enkä voi ni kulekšennella enämpi kuvamien kurjil'l'a töillä , kun kuletettih kuvamaisen kultatukka kurjil'l'a tiehysillä , tai kuvamien kulkutiehysillä .
Arpateillä aššutettih aikomaisen , ka ken rupieu hot' aijan myöhäsinä aššukšentelomah , kun aikomat noilta ankehilta töiltä aššutah .Nin vet ankeh vačča ualtoloina avauvukšentelou ankehella vartuol'l'ani , kun aikomien aikomat aššutah noilta ankehil'ta teiltä armašmielijen aikomien .
Veršomaistani viereteltih vientäteillä , ka ketäkä mie viekottelen viečorapäivän venyyvyntä aikasina ?Viečorapäivän venyyvyntä aijoilla vieren noil'l'a vierišijasilla , nin en voi vieron ašeuvukšennella vet , kun aivan viekottelen , jotta eikö hot' jo vierekšentelis vientäteiltä , ka ei ni vierekšentele viikkojen aikojen oltuo onnakko .
Enkä voi ni ouvotella onnakkoi , oneh vartuon , hot' mie ouvotellen olovat aijat , ka ei ni ken ni omitella vet .
Eikä vet ni ken ni tuletellai turtivo vartuoni tunnon šilmittelömäh , kun olen jo tupehtunnut ikäraiska , turtivo vartuvuisen .
Totutellah tuulipuolilla tuuvehie ilmoja tuo tuuvittamasen tunnon keskimmäini , ku oli tuoja hot' turtivolla vartuol'l'ani tuuvehien šanasien , ka ei ni veti tuottele , kun tuhmilla tiehysillä tunnon ašettelima tuon tuuvittamaseni .
Hot tuloteiltä tuuvittamat tullah , ka miun turtivo vartuoni tuhmenou turtivo vačča , jotta miula ei ni tulettele tunnon myöhäsinä iltatupehunta-aikasina , eikä kuvualeuvu kujin aivosina huomeneš kujin ylenyaikasina , kun kylvettämien kylmillä teillä kyhän ašetellah kylvettämäsen miun kynnyšvierysistä .
Ka ei ole vet ni kynnyšvierijä , kun on kylvettämät kynnysvieret kyhän ašeteltu kyvenliešmoiksi kylmäošalta kyhelmäl'tä vartuol'tani .
Niitä kaikki kurjaoša kurja vartuoni vet kujin olovil'ta šijoilta kurjien vesien kera kuvualeuvukšenteleuvuin , kuni kuuloistelen hot' kuvamien kololoilta puoliloilta kukkahie ilmoja .
En voi ni viestikirjasie vet viekotella vieröllä puolella viekašta ijäistäni , hot' viestikirjat vierekšenneltäis , nin eikö veššelyis tämä vieronan vartuoni viluoša viero vačča .
Vieröy kaikki loppuni jo viekkahil'ta ilmoil'ta vet ni vierekšennellyn ta jo on ni kavokšennellun kaunis ikäsen kaihol'ta vartuol'tani .En voi kajon ouvotella enämpi kaunehil'ta ilmoil'ta tai kannettuijen kaihoilta tiehysil'tä .
Aššukšentelou, aikomaisen
карельский: собственно карельское наречие
Кестеньгский