Тексты
Вернуться к списку | редактировать | удалить | Создать новый | История изменений | Статистика | ? Помощь
Silmienrissindävirzi
Silmienrissindävirzi
карельский: собственно карельское наречие
Мяндусельгский
Hoi
olovilla ilmoilla piällä azettaja ,
olova odžalannoi hyväzeni , tule onehta lindurukkua
ottamien osudittujen paikoilda ottamah ,
parembien ozien kera ottelomah .
Hoi kallehilla ilmoilla piällä azettaja ,
kallis hyväzeni , tule kargieda lindurukkua
kandamien kuaznittuloilda paikoilda ottamah
parembien čuastizien kera .
Hoi kallehilla ilmoilla piällä azettelija ,
kallis hyväzeni , vet kargie lindurukka
kandamien paikkoih omistai gluupista mielilöistä kannotteline .
Elä onehen lindurukan piällä otserdiete ,
olova odžalannoi hyväzeni .
Andele , olova odžalannoi , ottamien paikkoih
männes paremmat ozat ,
kui oneh lindu rukka ottamien paikkoihi oboidin .
Hoi , olova odžalannoi hyväzeni , kui oneh
lindurukka ottamien paikkoih oboidin , i
elä udrua lindurukkua unoha .
Andele lindurukalla liänimien paikkoih männessä
liävissä liänityt liävä liänimized .
Andele , oi kallis hyväzeni , ana miula kanamarjazella
kandamien paikkoih männessä katoksien alazed kaunozed (?).
Elä udrua lindurukkua uččimien paikkoih mänd'yö
ukoroidavaksi azeta .
Andele tuimalla linduzella
tuuvittamien paikkoih männessä
turbiemmat turkkisobazed .
Andele , hoi kallis hyväzeni ,
kargiella lindurukalla kaheksilda karičoilda
kautut kauhtana-sobazed .
Elä udrua utkalinnuista uččimattomilla
uččimilla ukoroidavaksi azeta .
Vet surendo lindurukka suvendamien paikkoih
suurih artt'eliloih mänen .
Ruvetah utkalinduzella ukoroimah uččimien paikoissa .
Hoi polvihyväzeni , pobiednoi lindurukka
polvien ottamien paikkoih mänen ,
ni rubie polvien ottamien paikoista sproviedaimah .
Hoi kallis hyväzeni ,
kuni kallehissa armozissa kazvaksendelin ,
ni sie ylen kallehena miuda kanamarjaista
kaikin aijoin kallehena kazvattelid .
Hoi armas hyväzeni , angehta lindurukkua
ylen armahaldi akkiloičit .
Monikerdazed , moniluaduzed passibod
andelen oi , paras hyväzeni .
Kui udra lindurukka uččimien paikkoih mändyhyö
rubien udalie armozie unohtamah ?
Hoi sugie sula hyväzeni , kuin rubien surendo linduzeni
suvendamien paikkoih mändyö sugeida armozie unohtamah .
Kui oneh lindurukka omista gluupista mielilöistä
ottamien paikkoih oboidin ,
ni kui rubien , hoi valgie hyväzeni ,
vaivane lindurukka vualimien paikkoih vagaudumah .
Ved roitah ylen suuret igävät sugeijen armozien jälgie
suvendamien paikkoih mändyö .
(Morsian itkee iäneen häiden alussa , "silmien ristimisen " jälkeen .)
Silmienrissindävirzi
карельский: собственно карельское наречие
Мяндусельгский