Тексты
Вернуться к списку | редактировать | удалить | Создать новый | История изменений | Статистика | ? Помощь
Muamon kuoltuu itkietäh virzi
Muamon kuoltuu itkietäh virzi
карельский: ливвиковское наречие
Ведлозерский
Nouziin
d'o aigazil huolevil huondeksuzil , meniin ilmoin pihazil .
Mindäh ylen viluzil viimaillou ?
En voinnuh ni mih luaduzih ajatellakseh .
Ažnoga on oldu naizen aigazen alenenduaigazet .
Blahoslovikkua kaksil seinäzil seizojat sidožat spuassazet
palehtunnuttu iččiedäni pagizuttamah .
Kon naine aigazeni armahien syndyizien eduizih alennuh .
D'ongoi en voi kyvelmö naine
kylliči kylli spuassazis kyzymättä kygevyö .
Kon naine vualiezeni vakki vuattiezih valmistettu .
Kui tuli vierdynyöh naizuoh verekset vieštizet .
Ennen ku , tuonikko naine , tulettelin ,
aivin oliit , vaimelo naine , iččiedäni vastailemas .
Nämien kerdazien tulduo rodih minul ylen suuret tunnukset ,
ken olluh kaunehien syndyizien edyizih kaduonduaigah ,
engo olluh armahien syndyizien edyizih alenusaigah .
Kolin , sammone naine , sadoin salmeksuzien tagan ,
dai tuhanzien tuluizien tagan .
Nygöi , naine kandajaizeni , kavahtele
kaksiel katkennuziel kandaipiähyzil ,
kollou valgielois spuassazis sinul valdane .
Opin palehtunnut naine kaikkeh luaduh sinuu pagizutella ,
ed anna ni paltinan aluzii paginazii .
Vikse on sinun leuguluuhuot luuhuzil lukkuzil lukutut ,
dai mustil pečattizil pečatoitut .
A oligo sinul , naine tuudittajazeni ,
tämän ilmazien lämmäzis lähties ylen suuret läylemäzet ?
Edgo kyvelmön naizen naine kylvettäjäzeni ,
kyly dorogaizil joudunuh , [juovunnuh ]
vai edgo vedyözih vaivah vaivunuh ?
Ken olluh sulien syndyizien edyzih lähties sinun suun edyzis .
Vikse olet surdunuon piäl suuttunuh , ket paginua anna .
Otettihgo sinul helyöt hengyöt kuldazil torielkazil ?
Vietettihgo sinuu , naine tuudittajazeni ,
viehkoitettuloi dorogaizii myö ?
Vai , naine kallis armozeni ,
kannateldih kamennoloi kaduzii myö ?
Anna nygöi , naine tuudittajazeni ,
ket olle surdunuon piäl suutuksis ,
kuun-polven aiguzet prosken'n'at .
Sinne on sin'ouvoit sildaizet
sidožoin syndyizien edeh mennes .
Astutettihgo niidy sildaizii myö ?
Siit sildazes mendyy on kuldoi kaivoine ,
kuldoi kaivozes on kuldane kruuškane .
Annettihgo sinulles kuivanuzii kulkuzii kastutella
vesselii vedyizii , mualiziin matkazien mendyy ?
Siit on nellilkymmenil nellil sagaroil avavujat
Abraman aiguzet ruajunverääzet .
Availtihgo sinulles sinne menendyaijakse ?
Siit on sidožien syndyzien edyzih mendyy
ilmazen ilman randah istutetut stolat .
Pandihgo sinuu sih stolazeh ?
Pandihgo sinuu , naine tuudittajazeni , alimazil agjazil ,
vai pandih keski stolan kohtazih , vai ylimäzil agjazil ?
(A niis stolis on joga kohtas yhtenmoiž syömine , kunnei i pandahes ).
...Naine , uroi kallis armozeni , ammuzil aigazil alennuh ,
tuligo kyvelmyö nastu kyzelemäh ?
Älä igäväzii izmenätä ilmoita hänelleh ,
k ei ugodei uavun pardahazil , ga k ei uaduh paku .
Annettihgo , naine kandajaizeni ,
muallizien matkazien mendyy magavustila ,
lunnastiidgo miittuon tilazen ?
Muamon kuoltuu itkietäh virzi
карельский: ливвиковское наречие
Ведлозерский