Тексты
Вернуться к списку | редактировать | удалить | Создать новый | История изменений | Статистика | ? Помощь
Kuin miän t’iäl’ä iänel’l’ä it’kiet’äh, luvetellah pokoin’iekalla (rod’it’el’alla, kuolluolla)
Kuin miän t’iäl’ä iänel’l’ä it’kiet’äh, luvetellah pokoin’iekalla (rod’it’el’alla, kuolluolla)
карельский: собственно карельское наречие
Толмачевский
Mie
Kat’t’i-čikolla luvettel’in i mamalla , a Jeholla en luvetellun šanotah , mužikkua on riähkä it’kie .
Zavod’ingo mie viehät’t’el’ömäh
omalla armahalla rod’it’el’azella
n’äil’l’ä igävil’l’ä minuwttaz’illa ,
rubiengo vielä luvettelomah
kallehella omalla imet’t’äjäzel’l’ä ,
šulašana armaštel’ijazella .
Pr’iimiečen jäl’l’ekkäzeh šanelomah
kallehella miwn noštajazella ,
vuat’t’ijalla i kengit’t’äjäz’el’l’ä ,
kargeida kywnel’yz’ie valuttelomah
n’äil’l’ä abeilla čuasuz’illa
kallehella ihanalla imet’t’äjäz’el’l’ä ,
tuškaz’ie hengel’d’ä hengäht’el’ömäh .
Oh , pas’s’ibo t’eil’ä , miwn armahat omazet
i šulašana sus’iedazet ,
kun t’yö kualel’ija n’äiks’i pimeiks’i ildaz’iks’i ,
kallehiks’i panafiida-aigaz’iks’i
miwnke viehät’t’el’ömäh
kallehie šyn’d’yz’ie ,
m’iwnke lawlelomah
kallehie st’iihuz’ie .
Oh , kal’l’is’ rod’it’el’az’en’i ,
miwn vara vaibun vardaloz’en’i !
I , možot , t’yö n’äl’l’ä kallehilla st’iihuz’illa
ihaššuttel’ija m’iwn ihalan im’et’t’äjäzen ,
kallehen rod’it’el’azen hel’ied’ä hengyt’t’ä .
Oh , pas’s’ibo t’eil’ä , armahat omazet
i šulašana sus’iedazet !
L’ien’öwgo väl’l’ennet’t’y miän rod’it’el’äzen ,
miän ihanan imet’t’äjäzen ,
n’äiks’i kallehiks’i panafiida-aigaz’iks’i
kallehet taivahal’l’izet šyn’d’yzet !
Oh , kal’l’is’ rod’it’el’az’en’i ,
ihala imet’t’äjäz’en’i ,
vara vaibun vardaloz’en’i !
T’yö miwn kalleh’et ihanat ijät’et’t’yzet !
Et’t’ägo voinnun t’äššä tunnuššella
omua kal’l’ista armos’t’a ?
Eigo vain nyt n’äil’l’ä igävil’l’ä aigaz’illa
hiän kierät’t’el’iäčennyn t’iän n’ägyvil’l’ä ?
Oh , t’yö miwn ihanat ijät’et’t’yzet ,
tunnuššelgua omua kal’l’is’t’a rod’it’el’ua !
Eigo kallehet šyn’d’yzet armaššeldu
miän ihalua imet’t’äjäs’t’ä ,
kal’l’ista m’iän rod’it’el’as’t’a
t’ädä varua vaibunnutta vardalos’t’a
kier’ät’t’el’iečömäh omih kallehih uglaz’ih ,
kier’ät’t’el’iečömäh ymbär’i kallehista santar’iz’ista
viel’ä ymbär’i r’is’sit’et’t’yl’öis’t’ä r’is’t’ikanžaz’ista ?
Oh , kal’l’is’ rod’it’el’az’en’i ,
ihala imet’t’äjäz’en’i ,
vara vaibun vardaloz’en’i !
Kuwl’ie šie , miwn kal’l’is’ main’ittavaz’en’i !
Možot en mie šigäl’i varuššellun
n’äid’ä kallehie panafiida-aigaz’ie ?
Možot en lunnaššellun n’äid’ä muiššinveroz’ie ?
Možot šie vain kier’ät’t’el’iečet
igävil’l’ä ikkunaluštaz’illa
da viel’ä igävil’l’ä laštupihaz’illa ?
Oh , kal’l’is’ rod’it’el’az’en’i ,
kaikešta miwn igäwdynnyöštä šiänalašta
viehät’t’el’en šiwla :
kuwl’ie šie , miwn kal’l’is’ rod’it’el’az’en’i !
Mie huoldel’iin n’ämä muis’s’inmurginazet
vähis’t’ä vägyz’is’t’ä ,
kualattel’iin šulašana sus’iedazet
omista hyvyz’is’t’ä
lawlattel’iin panafiidazet
yks’is’t’ä puoluz’istä .
Oh , šie miwn kal’l’is rod’it’el’az’en’i ,
ihala imet’t’äjän’e ,
vara vaibun vardalon’e !
L’ien’n’öwgo oldu šiwlaš vaigiet
n’ämä vaivundakerdazet ,
erotešša väl’l’äštä valgiešta valdilmašta
pit’in igäz’in viet’et’t’yöh ?
Viel’ä m’ie , igäwdynnyn ihon’e ,
kyžal’d’äz’in šiwlda , miwn ihala imet’t’äjäz’en’i ,
kal’l’is’ rod’it’el’az’en’i ,
vara vaibun vardaloz’en’i :
i l’iennetgo šie naživinnun iččiel’l’äš
hyvät tuonilmal’l’izet
valgiezet i l’ämbymäzet šijazet ,
n’e n’okattomazet i loppumattomazet eloaigazet ?
I l’iennetgo šie šel’l’it’t’än’n’yn n’e vekovečnoit
i beskonečnoit dorogazet ?
Oh , šie miwn kal’l’is’ rod’itel’az’en’i ,
šie miwn kal’l’is’ ihala imet’t’äjäz’en’i !
L’iennetgo maltellun šie igävil’l’ä aigaz’illa
kibunalaz’illa magavošijaz’illa
tuškewdunnuzella šiänalalla
ruguol’l’en pakota kaikenualazet prosken’iezet
kallehilda taivahal’l’iz’ilda šyn’d’yz’il’d’ä ,
viel’ä armahilda ijät’et’t’yz’il’d’ä
i kaikilda omahiz’ilda ,
i šulašana sus’iedaz’ilda ?
Oh , šie miwn kal’l’is’ rod’it’el’az’eni ,
ihala imet’t’äjäz’en’i ,
vara vaibun vardaloz’en’i !
Eruol’iitgo šie šuwr’ista i pien’is’t’ä
n’ägyväz’is’t’ä i n’ägymät’t’ömis’t’ä
šuwren valgien valdilman
kaikenualaz’ista r’iähis’t’ä ,
šie miwn kal’l’is rod’it’el’az’en’i ?
Viel’ä pros’t’iečitgo šie
päd’öväzeštä päiväz’eštä ,
l’iikkujista tuwluz’ista
i eis’t’yjis’t’ä valdilman pil’vyz’is’t’ä
i l’iivanista l’induz’ista l’en’d’äjis’t’ä ?
Oh , šie miwn kal’l’is’ rod’it’el’az’en’i ,
šie miwn armaš vaibun vardalon’e !
Konža otettih šiwn
kallehet taivahal’l’izet an’hel’izet
kakšista käz’ipuol’iskoz’ista
i šuateldih šiwn armahin šuwr’in šynd’yz’in ed’eh ,
vied’ih šuwr’ih kallehih doprossuz’ih ,
miwn kal’l’is’ rod’it’el’az’en’i ,
i viel’ägo l’iennöw šuannun šiwla
myt’t’yöt otviettazet andua kallehilla
taivahal’l’iz’illa šyn’d’yz’il’l’ä .
Oh , šie , m’iwn kal’l’is rod’it’el’az’en’i ,
armaš ihala imet’t’äjäz’en’i ,
vaibunnun vardaloz’en’i !
Tulguakko t’yö miwn ihalat ijät’ett’yzet ,
keräwd’ykkiäkkö t’yö , miwn armahat šiänšiz’äryöt ,
kerrikkiäkkö t’yö , miwn viekkahat veikkozet !
Ei meil’ä pid’äis’ n’äil’l’ä igävil’l’ä kolmilla suwtkaz’illa
omie šil’mie kuivual’l’a ,
vain pid’äis’ iänel’l’ä omua abieda viehät’el’l’ä
da viel’ä l’ubuija miän kallehen rod’it’el’azen
šomua ihos’t’a .
On kerrinnyöt eravoaigazet !
Armaššelgo jäl’gimäzet minuwttazet
omua ihalua imet’t’äjäs’t’ä ,
vaibunnutta vardalos’t’a ,
kal’l’ista rod’it’el’as’t’a !
Kuin miän t’iäl’ä iänel’l’ä it’kiet’äh, luvetellah pokoin’iekalla (rod’it’el’alla, kuolluolla)
карельский: собственно карельское наречие
Толмачевский