Тексты
Вернуться к списку | редактировать | удалить | Создать новый | История изменений | Статистика | ? Помощь
Kewhe Lavri
Kewhe Lavri
карельский: людиковское наречие
Южнолюдиковский (святозерский)
Oli
eli kewhe Lavri .Hänel akke kuolow , diäi hänele poige da tytär .Lavri kuolow .Vel’l’eh sizärele sanow :
– Minä lähten burlakakse , elod suamah .Anda ičeis kartočke minule .
Ottaw sizärel kartočkan i prostihes sizäres , dai lähtöw .Menöw tartuw cairile kazakakse heinäd niittämäh .Ottaw kormanis häin sizären kartočkan , dai rubedaw kaččomah .Cairin poige nägi , kačow kartočkad – ylen čoma oli kartočke , sanow :
– Ozuta minule kartočkad .
Häin ottaw kartočkan ozuttaw cairin poigale .Cairin poige sanow :
– Anda sizär minule mučoikse , enämbe ei pidä sinule heinäd niittädä .
– Ottaned , ga kuibo en anda minä cairin poigale !
Andaw äijän d’engat cairin poige , andaw kakse pluat’t’ad .Tulow häin sizärellyö kodih :
– Vot , hyvä sizäryiženi , läkkä cairin poigale mučuoikse .Vot anduoi cairin poige d’engad äijän i kakse pluat’t’ad : yhten anduoi kainid , toizen anduoi villaižen !
Ištuttiheze hyö veneheh , lähtedih ajamah .Ajetah niemeh suai , i niemes kirguw staruwhe :
– Hoi hyvä brihaine i hyvä tyttöine , ottagad minud veneheh !
Häin i sanow vel’l’elleh :
– Ei pidä ottai , veikuoi , häin panow meid vedeh , veneh ei kestä !
Lähtetäh edelleh ajamah .Tulow , läheniškändi toine niemi , opät’ že kirguw :
– Ottagad , hyvä tyttöine , hyvä brihaine , minud veneheh !
Ajaw vel’l’eh venehen randah .Staruwhan panow veneheh , iče lähtöw astumah .Dorog mänöw kolmandeh niemeh , i kirguw vel’l’eh :
– Čid’žuoi , pane kaini pluat’t’e piäle !
A sizäreh sanow :
– T’otoi , midäbo velli kirgui ?
Sanow :
– Kirguw : ota robehine kädeh , pane kaini pluat’t’e piäle , hyppiä vedeh !
Lähtedih edelleh ajamah .Ajetah niemed lähembäkse , vel’l’eh i kirguw :
– Čid’žuoi , pane villaine pluat’t’e piäle , kačo , cairin dvorče nägyw .
– T’otoi , minule ei kuulunuh sowtes , midäbo velli kirgui ?
– Sanow , raukke , sinule vel’l’es : pane villaine pluat’t’e piäle , ota robehine kädeh i hypni vedeh !
– Midä liene minun piäle nenga vellirukke suuttunu ?
Panow häi pluat’t’aižen piäle villaižen , ottaw häin robehižen kädeh , hypniw vedeh .
Ajaw Syvätterin akke randah i ottaw iččeh tyttären i ajaw cairin pristanih .Cairin poige vuottaw , tuli – ga eibo se ole , kudai oli hänen kartočkal .Häin yksikai ottaw mučuoikse sen neidižen .A vel’l’eh piäle tuskevui cairin poige , vel’l’eleh Iivanal , značit , peän leikkadaw , mikse muanitti , i lykkäidäw tulovišan bokale , a piän levole , i työndäw yöl omad ruadajad varduoiččemah piädä : eigo midä čuwdide , eigo midä sbuwdide .
Mäni karavul , rodiheze puoli yöd – avaidui därvi kaksaile piäi , tulow neidine dorogad myöte i vieröw vel’l’elleh piäle i itköw gu koivud kuadaw i sanow :
– Hoi vellirukke , minud menetid dai iče menid !Kačo , sinul piä leikattih , a minud vedehižele miehele andetah !
Čieppi helähtiheze , därvi šorahtiheze .Tuldah hyö cairilluo , cairi i kyzyw :
– Midäbo nägitte ili kuwlitte ?
– Myö kuwlimme i nägimme , ga sinä ed usko , hot’ myö i sanonemme ! Läkkä sinä iče tulevan yön .
Mendäh toš yön , rodih puoli yöd – därvi avawduškanzi kaksaile piäi , rodiih dorog , tulow ylen čoma neidine , vai čieppi heližöw .Tulow i vieröw Iivanale piäle i itköw , gu koivud kuadaw :
– Vot sinule piä leikattih , a minud vedehižele ...Huomei venčale pidäw mändä , lopun kieran tulen huomei .
Čieppi helähtih , därvi šorahtih .
Tulow cairin poige , ottaw diedon sabl’an ruostunuden , andaw kazakuoile tahkota , stobi raudan leikadaiš !
Mendäh kolmanden yön karavuulah , rodiihize puoli yöd – därvi šorižiškanzi , avaidui dorog , čieppi vai heližöw – tulow ylen čoma neidine .Vieriškändi vel’l’eh piäle i itköw , gu koivut kuadaw , i sanow vel’l’ele :
– Nygyöi , kačo , lopun kieran tulin , enämbäd en tule , – vedehižen kera venčale mänen !
Cairin poige gu vedäldäw sabl’al , čieppi vai helähtäh i poikki .Vedehine dernii – tyhje čieppi helähtih , neidine sih däi .
– Vot , nygöi , mibo sinul on nimi , sano !
– Minun nimi on Nast’a , a ižän nimi Lavri – Nastasja Lavrentjevna , a vel’l’en nimi minun Iivan oli .
– Vot Nastasja Lavrentjevna , nygyöi einä roditos minule mučuoikse !
– Minä mučuoikse sinule , cairin poige , en voi tulda ! Hengištyttäned minun vel’l’en , siid tulen .Kuni et hengištyttäne , sini en tule mučuoikse !
Työndäw cairin poige omad kazakat , kakse ruadajad , vuodekse andaw srokan : "Jesli ette voinne tuoda eläväd da kuol’aid vette , siid piäd iäres "!
Hyö otpravilis’ i lähtedih eläväd vette eččimäh .Ečitäh , ečitäh , ni kui ei voita löytä , d’o vuozi lopuškale mänöw .Astutah dorogad myöte – viruw poikki dorogad mado kuuden verškan därevys , gu parzi .Yksi hypnii , ot’ti kangen , tahtuoi rikkoda madon .Mado diävii ristityn iänen :
– Älä riko minud , a minä tiedän , midä työ ečitte , minä teile nevvon .Työ ečitte – eläväd da kuol’aid vette pidäw .Mängät työ nengoman meren randah , meren randas seižow istarinnuoi duube .Duuban al on sundug raudaine i sundugas on däičče , a däičän sydämes on kakse butilkaište – yhtes on eläväd veded , toižes on kuol’aid veded .
Mändih hyö duuballuo , davai roida , tuli sundug , avait’tih sundug – šigä on däičće , a däičän sydämes kakse butilkaište : yksi eläväd vette , toine – kuol’aid .
Hyö punaltaheze kodih , tuldah cairilluo , andettah cairile butilkaižed :
– Vot , – sanow , – täs on kuol’aid veded , täs on eläväd veded !
Mändäh pandah piä tuulovišanke vastakkai , briznitäh kuol’ail vedel – rodiheze kuolii , briznitäh eläväl vedel – hypästähes :
– Ah , hätken i magažin !
A sizäreh sanow :
– Oh , vellirukke , minud gu ei olnuis , ga igän magannužid !
Panow cairin poige kylyh omad ruadajat – kaivetah pahne kylyn uksen edeh .Pahnah pandah suuri kattil , kattilah täwz tervad i tervad kiehumah , i käsköw tervekattilan polovikal kattada .Tulow kodih cairin poige :
– Gu himo oli Syvätterin tyttärel šokkid sydidä , ga läkkä nygöi kylyh , gu kyly pidi !
Polgow d’algan piäliči kyndykses kylyh – bučkahtiheze kiehujah tervekattilah .Šigä vie tänäpäi kiehuw .
Tulow häi kodih , cairin poige , ottaw oman , kudai on Nastasja Lavrentjevna , kädez i rodiiheze piiru heile svuadebnoi na ves’ miiru .I rubeži carstvuimah omal carstval nastojuaššoikse cairikse , otti Nastasjan Lavrentjevnan mučuoikse , a Iivanan pani generualakse .I sluužii Iivan cairin generualannu omah vahnah igäh suai .
Kewhe Lavri
карельский: людиковское наречие
Южнолюдиковский (святозерский)
–
–
–
–
–
–
–
–
–
–
–
–
–
–
–
–
–
–
–
–
Бедный Лаври
русский
–
–
–
–
–
–
–
–
–
–
–
–
–
–
–
–
–
–
–
–